वरोरा :- ✍️ अभिषेक किशोर भागडे
वरोरा तालुक्यातील हळद उत्पादक शेतकऱ्यांच्या आयुष्यात आता सुवर्णकाळ येणार आहे. वरोऱ्यातील हळदीला जागतिक स्तरावर ओळख मिळवून देण्यासाठी आणि शेतकऱ्यांच्या उत्पन्नात भरघोस वाढ करण्यासाठी कृषी विभागाने कंबर कसली आहे. जिल्हाधिकारी श्रीमती वसुमना पंत यांच्या मार्गदर्शनाखाली आता हळद पिकाला जीआय (GI Tag) मानांकन मिळवून देण्यासाठी विशेष मोहिमेला सुरुवात करण्यात आली असून, आधुनिक तंत्रज्ञानाचा वापर करून उत्पादकता दुप्पट करण्याचे ध्येय निश्चित करण्यात आले आहे.
आधुनिक तंत्रज्ञान आणि शेती शाळा: शेतकऱ्यांसाठी पर्वणी
पारंपारिक शेतीला छेद देत आता वैज्ञानिक दृष्टिकोनातून हळद लागवडीवर भर दिला जात आहे. या उपक्रमांतर्गत:
हळद शेती शाळा (Turmeric Field School) प्रत्यक्ष शेतावर आधुनिक लागवड पद्धतींचे प्रात्यक्षिक दाखवण्यासाठी विशेष शाळा सुरू करण्यात आली आहे.
अभ्यास दौरे :- शेतकऱ्यांना औरंगाबाद आणि परभणी येथील प्रगत शेतीचे दर्शन घडवण्यासाठी अभ्यास दौऱ्यांचे आयोजन करण्यात आले आहे.
आंतरपीक तंत्रज्ञान :- कमी जागेत अधिक उत्पादन घेण्यासाठी आंतरपीक पद्धतीचा अवलंब करण्यावर कृषी विभागाचा भर आहे.
प्रशासनाचा सक्रिय सहभाग
हा उपक्रम यशस्वी करण्यासाठी जिल्हा अधीक्षक कृषी अधिकारी श्री. शंकर तोटावार, प्रकल्प संचालक ‘आत्मा’ श्री. अरुण कुसळकर, नाबार्डचे डी.डी.एम. श्री. तृणाल फुलझेले आणि कृषी उपसंचालक श्री. चंद्रकांत ठाकरे यांच्या मार्गदर्शनाखाली वरोरा विभागातील तज्ज्ञांची फळी तैनात करण्यात आली आहे.
उपविभागीय कृषी अधिकारी श्रीमती कविता हरीणखेडे, तहसीलदार श्री. कौटकर, तालुका कृषी अधिकारी श्री. रवी राठोड आणि त्यांच्या संपूर्ण टीमकडून शेतकऱ्यांना सातत्याने मार्गदर्शन दिले जात आहे. यामध्ये मंडळ कृषी अधिकारी श्री. घनश्याम पाटील, श्री. गजेंद्र पुसदेकर, उपकृषी अधिकारी श्री. आकाश गोखरे, सहाय्यक कृषी अधिकारी श्री. सचिन ठोंबरे आणि श्री. विशाल घागी हे प्रत्यक्ष बांधावर जाऊन शेतकऱ्यांचे सक्षमीकरण करत आहेत.
शेतकऱ्यांच्या हातात असेल समृद्धी
या उपक्रमामुळे वरोऱ्यातील हळद आता फक्त स्थानिक बाजारपेठेतच नाही, तर जीआय मानांकनामुळे राष्ट्रीय आणि आंतरराष्ट्रीय बाजारपेठेतही आपली ओळख निर्माण करेल. ‘लाभान सराड फार्मर प्रोडूसर कंपनी’चे संचालक श्री. मोरेश्वर राऊत यांच्यासह श्री. उमेश तडस, श्री. प्रकाश कामडी, श्री. विठ्ठल कोसुरकर आणि सर्व प्रगतशील शेतकरी या मोहिमेत खांद्याला खांदा लावून सहभागी झाले आहेत.
स्थानिक सरपंच श्री. नामदेव थाटे, पोलीस पाटील श्री. ऋषी तुरारे आणि गावातील इतर सर्व उत्साही शेतकरी बांधवांच्या सहकार्याने हा उपक्रम वरोरा तालुक्यातील शेती क्षेत्रासाठी एक मैलाचा दगड ठरणार आहे.
“आता वरोऱ्याची हळद केवळ पीक राहणार नाही, तर ती शेतकऱ्यांच्या समृद्धीचे माध्यम ठरेल. कृषी विभागाची ही मोहीम शेतकऱ्यांच्या आयुष्यात मोठा बदल घडवणारी ठरेल.”
