वणी :- महाराष्ट्र नवनिर्माण सेना (मनसे) वणी विधानसभा क्षेत्राच्या वतीने आयोजित बहुचर्चित ‘मनसे गरबा महोत्सवा’च्या नृत्य प्रशिक्षणाला आजपासून शहरात दिमाखात सुरुवात झाली आहे. वणी जिल्ह्यात या महोत्सवाची मोठी उत्सुकता असते, आणि त्याची झलक आज पहिल्याच दिवशी प्रशिक्षण वर्गाला लाभलेल्या प्रचंड व अभूतपूर्व प्रतिसादावरून दिसून आली.
शहरातील शेतकरी मंदिर सभागृह येथे दररोज सायंकाळी ५ ते ९ या वेळेत हे प्रशिक्षण पार पडत आहे. गरबाप्रेमी आणि स्पर्धकांना नृत्याची अचूक लय, ताल तसेच गरब्याच्या पारंपरिक व आधुनिक स्टेप्स शिकण्यासाठी हे प्रशिक्षण अत्यंत मोलाचे ठरत आहे. उद्घाटनाच्या पहिल्याच दिवशी सभागृहात महिला वर्ग आणि तरुणाईमध्ये अफाट उत्साह पाहायला मिळाला.
महोत्सवाची ठळक वैशिष्ट्ये:
- भव्य आयोजन :- दरवर्षीप्रमाणे यंदाचा महोत्सव अधिक दिमाखदार आणि आकर्षक करण्याचा मनसेचा मानस आहे.
- सेलिब्रेटींची उपस्थिती :- महोत्सवाचा मुख्य सोहळा आणि बक्षीस वितरण सोहळ्यासाठी नामांकित सिनेतारका विशेष उपस्थिती लावणार आहेत.
- व्यावसायिक मार्गदर्शन :- नामांकित नृत्य प्रशिक्षकांद्वारे गरब्याचे धडे दिले जात आहेत.
या महोत्सवाने आतापासूनच वणी शहरात नवरात्रोत्सवाचे वारे वाहू लागले आहेत. मनसेच्या वतीने जास्तीत जास्त गरबाप्रेमींनी या मोफत/विशेष प्रशिक्षणाचा लाभ घ्यावा, असे आवाहन करण्यात आले आहे.
