🛑 फाईल हलते पैशाने…. मंत्रालय चालते हप्त्याने! 🛑

फाईल हलते पैशाने… मंत्रालय चालते हप्त्याने!

महाविकास आघाडीच्या वतीने आज राज्यातील कथित भ्रष्टाचाराच्या मुद्द्यावरून विधिमंडळाच्या पायऱ्यांवर जोरदार आंदोलन करण्यात आले. राज्याचे प्रशासनिक केंद्र असलेल्या मंत्रालयमध्ये घडलेल्या अलीकडील घटनांवरून सरकारवर गंभीर आरोप करण्यात आले.

आंदोलनकर्त्यांनी आरोप केला की, मंत्रालयातील एका कॅबिनेट मंत्र्याच्या दालनात लाचलुचपत प्रतिबंधक विभागाची कारवाई होऊन मंत्र्यांच्या स्वीय सहाय्यकाला लाच घेताना पकडले जाणे ही अत्यंत लाजिरवाणी घटना असून यामुळे संपूर्ण महाराष्ट्राची मान खाली गेली आहे. “फाईल हलते पैशाने… मंत्रालय चालते हप्त्याने!” अशा घोषणा देत आंदोलनकर्त्यांनी सरकारविरोधात तीव्र संताप व्यक्त केला.

यावेळी आंदोलनकर्त्यांनी सांगितले की, इतका गंभीर प्रकार घडूनही संबंधित मंत्र्यावर कोणतीही ठोस कारवाई करण्यात आलेली नाही. उलट राज्याचे मुख्यमंत्री देवेंद्र फडणवीस यांनी त्या मंत्र्यांना क्लीनचिट दिल्याचा आरोप करण्यात आला. त्यामुळे भ्रष्टाचाराला संरक्षण दिले जात असल्याचा गंभीर सवालही उपस्थित करण्यात आला.

या पार्श्वभूमीवर मंत्रालयात भ्रष्टाचाराचे वातावरण निर्माण करणाऱ्या संबंधित मंत्र्याचा तातडीने राजीनामा घ्यावा, अशी मागणी करत महाविकास आघाडीच्या नेत्यांनी व कार्यकर्त्यांनी जोरदार घोषणाबाजी केली. तसेच या प्रकरणाची सखोल चौकशी करून दोषींवर कठोर कारवाई करावी, अशीही मागणी आंदोलनकर्त्यांनी केली.

या आंदोलनामुळे विधिमंडळ परिसरात काही काळ तणावाचे वातावरण निर्माण झाले होते.