🙏🛑 अमली पदार्थमुक्त वणी,हेच आपले ध्येय ! 🛑🙏

अमली पदार्थमुक्त वणी, हेच आपले ध्येय..!

वणी : शहर व परिसरातील तरुण पिढीचे भविष्य सुरक्षित ठेवण्यासाठी अमली पदार्थांच्या विक्री व सेवनाविरोधात आता कठोर पावले उचलण्यात येत आहेत. वणी विधानसभा मतदारसंघाचे आमदार संजय देरकर यांनी याबाबत स्पष्ट भूमिका घेत “अमली पदार्थांविरोधात झिरो टॉलरन्स धोरण राबवले जाईल,” असा इशारा दिला आहे.

आमदार देरकर यांनी सांगितले की, वणी शहर व परिसरात कुठेही अमली पदार्थांची विक्री किंवा सेवन आढळल्यास संबंधित व्यक्तींवर तात्काळ व कठोर कायदेशीर कारवाई करण्यात येईल. यासाठी पोलीस प्रशासन तसेच संबंधित विभागांना स्पष्ट आदेश देण्यात आले असून, तरुण पिढीचे भविष्य सुरक्षित ठेवणे ही प्रशासनाची सर्वोच्च प्राथमिकता असेल.

“हा प्रश्न केवळ प्रशासनाचा नसून आपल्या मुलांच्या आणि संपूर्ण वणीच्या भविष्याचा आहे. त्यामुळे नागरिकांनीही या गंभीर समस्येकडे लक्ष देऊन सतर्क राहावे. अमली पदार्थांच्या व्यवहाराची माहिती मिळाल्यास तात्काळ प्रशासनाला कळवावी,” असे आवाहनही त्यांनी केले.

समाजाच्या भवितव्याशी खेळणाऱ्यांना कोणतीही गय केली जाणार नाही, असा ठाम इशारा देत आमदार देरकर यांनी वणी शहर अमली पदार्थमुक्त करण्यासाठी सर्वांनी एकजुटीने पुढे येण्याचे आवाहन केले आहे.
“अमली पदार्थमुक्त वणी हेच आपले ध्येय असून, सुरक्षित आणि उज्ज्वल भविष्यासाठी हा लढा अखेरपर्यंत सुरू राहील,” असे त्यांनी स्पष्ट केले.