वरोरा :- मिलन चौक येथील सार्वजनिक गणेशोत्सव मंडळाने यंदा एक अत्यंत अनोखी आणि भव्य श्री गणेश मूर्ती साकारून सर्वांचे लक्ष वेधून घेतले आहे. “मिलन चौकाचा राजा” म्हणून ओळखल्या जाणाऱ्या या गणपती बाप्पाची मूर्ती पाहताच भक्तीने नतमस्तक व्हावे अशी आहे. यंदाच्या उत्सवात या मंडळाने एक वेगळा आणि आध्यात्मिक संदेश देण्यासाठी ५५०८ रुद्राक्ष आणि १००८ पवित्र तुळशीमाळांचा वापर करून ही दिव्य मूर्ती घडवली आहे.
🙏 समाजाला अध्यात्मिक संदेश 🙏
एकीकडे उत्सवातील वाढता देखावा आणि दिखाऊपणा वाढत असताना, मिलन चौक मंडळाचा हा उपक्रम परंपरेला आणि अध्यात्मिक मूल्यांना जोडणारा आहे. रुद्राक्ष हे भगवान शिवाचे प्रतीक मानले जाते, तर तुळशीमाळ विष्णू भक्तीचे प्रतीक आहे. या दोन्ही पवित्र वस्तूंचा वापर करून बनवलेली ही मूर्ती भक्तांमध्ये शांतता आणि सकारात्मक ऊर्जा निर्माण करणारी आहे. मंडळाचे अध्यक्ष श्री. प्रवीण चिमूरकर (माजी सैनिक) तथा नगरसेवक म्हणाले की, “आमचा उद्देश केवळ मूर्ती बनवणे हा नव्हता, तर आजच्या धकाधकीच्या जीवनात लोकांना पुन्हा एकदा अध्यात्म आणि भारतीय संस्कृतीशी जोडणे हा होता. रुद्राक्ष आणि तुळशीमाळांचा वापर करून आम्ही समाजात एक पवित्र संदेश देऊ इच्छितो.”
🙏 मूर्तीची वैशिष्ट्ये उत्कृष्ट मूर्ती सजावट व कला-कसब🙏 ही दिव्य आणि विलोभनीय मूर्ती साकारण्यात अनेक तरुणांचे आणि कलाकारांचे मोठे योगदान लाभले आहे. मूर्ती सजावटीची धुरा प्रतीक कुंभारे, रवी चिकाटे, करण ढेंगळे, तेजस कुंभारे, मंथन गज्जलवार, चैतन्य गज्जलवार, ओम मेश्राम, लखन पवार, आशिष मोगरे, नितेश परचाके यांनी सांभाळली असून रिद्धी व सिद्धी नक्षीने यानी कलेला चार चांद लावले आहेत. या सर्वांच्या अहोरात्र मेहनतीमुळे बाप्पाचे रूप अतिशय आकर्षित व तेजस्वी आणि जिवंत भासत आहे.
मंडळ पदाधिकाऱ्यांचे परिश्रम:
या संपूर्ण सोहळ्याच्या यशस्वी आयोजनासाठी आणि आगळ्यावेगळ्या उपक्रमासाठी अध्यक्ष – प्रवीण चिमुरकर, सचिव – बंडू मेश्राम आणि कोषाध्यक्ष – सुनील गज्जलवार यांनी विशेष मार्गदर्शन व परिश्रम घेतले आहेत. तसेच राजेश पोलशेट्टीवार यांचे बहुमूल्य सहकार्य लाभले असून साई गणेश मंडळ व प्रसन्न गणेश मंडळ यांनी विशेष सहकार्य केले आहे.
ही मूर्ती पूर्णपणे ५५०८ रुद्राक्ष आणि १००८ तुळशीमाळा एकत्र गुंफून तयार करण्यात आली आहे.
मूर्तीचे रूप अत्यंत सात्विक आणि मोहक आहे. रुद्राक्षांचा नैसर्गिक रंग आणि तुळशीमाळांची पांढरी शुभ्रता मूर्तीच्या सौंदर्यात भर घालत आहे.
कोणत्याही रासायनिक रंगांचा वापर न केल्यामुळे ही मूर्ती पर्यावरणपूरक आहे आणि तिचे विसर्जन देखील सहजतेने होऊ शकते.
