वरोरा :- शहरातील रखडलेली विकासकामे आणि नागरिकांच्या दैनंदिन समस्यांवरून वरोरा नगर परिषदेने आता आक्रमक पवित्रा घेतला आहे. आयोजित आढावा बैठकीत मुख्याधिकारी सिद्धार्थ मेश्राम आणि नगराध्यक्षा अर्चना ठाकरे यांनी संबंधित विभागांना कडक शब्दांत सूचना देत, विकासकामांच्या अंमलबजावणीवर भर दिला आहे.
👉 प्रमुख निर्णयांकडे लक्ष
शहराचा कायापालट करण्याच्या उद्देशाने बैठकीत खालील मुद्द्यांवर विशेष चर्चा करण्यात आली:
👉 तलाव सौंदर्यीकरण शहराचे वैभव असलेल्या तलावाचे सुशोभीकरण लवकरात लवकर पूर्ण करण्याचे निर्देश देण्यात आले.
👉 अतिक्रमण हटाव मोहीम शहरात दिवसेंदिवस वाढणाऱ्या अतिक्रमणाबाबत तीव्र नाराजी व्यक्त करत, ही अतिक्रमणे तत्काळ हटवण्याचे आदेश प्रशासनाला देण्यात आले.
👉 पाणीपुरवठा व स्वच्छता नागरिकांना सुरळीत पाणीपुरवठा मिळावा, नाल्यांची नियमित साफसफाई व्हावी आणि सार्वजनिक शौचालयांच्या स्वच्छतेची चोख व्यवस्था ठेवावी, अशा सक्त सूचना देण्यात आल्या.
👉 प्रभावी अंमलबजावणीची ग्वाही
बैठकीत केवळ चर्चा न करता, प्रलंबित कामांचा सविस्तर आढावा घेण्यात आला. विकासाच्या आड येणाऱ्या तांत्रिक अडचणी दूर करून, जनहितार्थ चाललेली कामे गतिमान करण्याचे आदेश देण्यात आले. या बैठकीला नगराध्यक्षा अर्चनाताई ठाकरे, मुख्याधिकारी सिद्धार्थजी मेश्राम यांच्यासह सर्व नगरसेवक-नगरसेविका आणि विभागांचे प्रमुख अधिकारी उपस्थित होते.
वरोरा शहराच्या शाश्वत विकासासाठी ही बैठक एक निर्णायक पाऊल मानली जात असून, आता प्रशासनाच्या या आक्रमक भूमिकेची प्रत्यक्ष अंमलबजावणी कधी होते, याकडे सर्व वरोराकरांचे लक्ष लागले आहे.
🙏 जय विदर्भ 🙏
