पांढरकवडा / केळापूर :- सततच्या अतिवृष्टीमुळे अस्मानी संकटात सापडलेल्या बळीराजाला धीर देण्यासाठी आणि त्यांच्या नुकसानीची प्रत्यक्ष पाहणी करण्यासाठी मा. आमदार प्रा. श्री. राजूभाऊ तोडसाम यांनी तातडीने धाव घेतली आहे. तालुक्यातील डांगरगाव, कोळी (खु.), कोळी (बु.), उंदरणी, कापशी (कोपरी), कवठा, मांजरी आणि मानुसधरी या गावांचा झंझावती दौरा करत त्यांनी थेट बांधावर जाऊन शेतकरी बांधवांच्या वेदना आणि समस्या जाणून घेतल्या.
“संकटाच्या या बिकट काळात शेतकऱ्यांच्या पाठीशी ठामपणे उभे राहणे, हीच आमची खरी बांधिलकी आहे. बळीराजाला एकाकी पडू देणार नाही,”असा ठाम विश्वास यावेळी आ. राजूभाऊ तोडसाम यांनी दिला.
प्रत्यक्ष बांधावर जाऊन टिपले शेतकऱ्यांचे अश्रू
पिकांचे अतोनात नुकसान :-अतिवृष्टीमुळे हातातोंडाशी आलेला घास हिरावला गेल्याने शेतकरी हवालदिल झाला आहे. आ. राजूभाऊंनी स्वतः शेतात उतरून सोयाबीन, कापूस व इतर पिकांच्या झालेल्या नुकसानीची पाहणी केली.
आस्थेने विचारपूस :- गावोगावी जाऊन प्रत्येक शेतकरी कुटुंबाच्या अडीअडचणी समजून घेत त्यांनी उपस्थितांना धीर दिला.
पंचनाम्यांच्या सूचना :- प्रशासकीय अधिकाऱ्यांशी तत्काळ संपर्क साधून कोणतीही हेळसांड न करता तातडीने आणि अचूक पंचनामे करण्याचे कडक निर्देश त्यांनी दिले.
शासकीय मदतीसाठी तीव्र पाठपुराव्याचा संकल्प
निसर्गाच्या लहरीपणापुढे हतबल झालेल्या शेतकऱ्यांना न्याय मिळवून देण्यासाठी आ. राजूभाऊंनी शासन दरबारी जोरदार पाठपुरावा करण्याचे आश्वासन दिले आहे. “शेतकऱ्यांना हक्काची आणि आवश्यक ती पूर्ण नुकसानभरपाई मिळेपर्यंत आपण गप्प बसणार नाही,” अशी आक्रमक भूमिका घेत त्यांनी शासनाकडून तात्काळ आर्थिक मदत मिळवून देण्याचा निर्धार व्यक्त केला.
आमदारांच्या या धावपळीमुळे आणि आपुलकीच्या भूमिकेमुळे अतिवृष्टीग्रस्त भागातील शेतकरी बांधवांना मोठा मानसिक आधार मिळाला असून, कठीण प्रसंगी पाठीशी खंबीर नेतृत्व उभे असल्याचा विश्वास ग्रामीण भागात निर्माण झाला आहे.
