🛑🙏विद्यार्थ्यांच्या खाद्य महोत्सवाला उत्स्फूर्त प्रतिसाद; पालकांनी घेतला स्वादिष्ट पदार्थांचा आस्वाद🙏🛑

आनंदवन :-शाळेच्या प्रांगणात विद्यार्थ्यांच्या कल्पकतेला आणि कौशल्याला वाव देणारा खाद्य महोत्सव मोठ्या उत्साहात पार पडला. या कार्यक्रमाचे उद्घाटन मान्यवर श्री. कडू सर यांच्या हस्ते करण्यात आले. कार्यक्रमाला प्रमुख पाहुणे म्हणून श्री. राजेश ताजने, श्री. बोथले, श्री. हेमाणे, श्री. शेंडे, श्री. ठाकरे, श्री. अहिरकर, श्री. मेश्राम, सौ. मंधारे तसेच इतर मान्यवर सदस्य उपस्थित होते.

कार्यक्रमाची सुरुवात सर्व मान्यवरांच्या हस्ते पारंपरिक पद्धतीने दीपप्रज्वलन करून करण्यात आली. त्यानंतर मुख्याध्यापक श्री. नागाजी साळवे यांनी प्रभावी प्रास्ताविकातून कार्यक्रमामागील उद्देश स्पष्ट केला. विद्यार्थ्यांमध्ये उद्योजकतेची भावना, सर्जनशीलता आणि व्यवहारज्ञान विकसित व्हावे, यासाठी या उपक्रमाचे आयोजन करण्यात आल्याचे त्यांनी सांगितले.

या उपक्रमात इयत्ता पहिली ते आठवीपर्यंतच्या विद्यार्थ्यांनी विविध स्वादिष्ट खाद्यपदार्थांचे आकर्षक स्टॉल उभारले होते. विद्यार्थ्यांनी कल्पकतेने सजवलेले स्टॉल आणि विविध पदार्थांची चव यामुळे कार्यक्रमाला उपस्थित पालक आणि नागरिकांनी मोठ्या उत्साहाने प्रतिसाद दिला. पालकांनी विद्यार्थ्यांच्या मेहनतीचे कौतुक करत पदार्थांचा मनसोक्त आस्वाद घेतला.

मुख्याध्यापक श्री. नागाजी साळवे यांच्या मार्गदर्शनाखाली शिक्षकवृंदाने या कार्यक्रमाच्या यशस्वी आयोजनासाठी विशेष परिश्रम घेतले. यात श्री. मुरस्कर, सौ. गायकवाड, सौ. ढवस, सौ. अनिवाल, श्रीमती आत्राम, श्री. डावे, श्री. अमोल आवारी, श्री. बंडु कावर यांनी अथक मेहनत घेत कार्यक्रम यशस्वी केला.

कार्यक्रमाचे सुत्रसंचालन श्री. बंदूरकर यांनी प्रभावीपणे केले, तर शेवटी सौ. ढवस यांनी उपस्थित मान्यवर, पालक व सर्व सहकाऱ्यांचे आभार मानून कार्यक्रमाची सांगता केली.

या उपक्रमामुळे विद्यार्थ्यांमध्ये आत्मविश्वास वाढण्यासोबतच प्रत्यक्ष अनुभवातून शिकण्याची संधी मिळाली असून, कार्यक्रम सर्वांच्या स्मरणात राहील असा ठरला.