🦚 श्रीकृष्ण जन्माष्टमी उत्सवाची भद्रावतीत जय्यत तयारी; शिवसेनेकडून भव्य आयोजनाची घोषणा

अभिनेते–अभिनेत्रींच्या उपस्थितीने रंगणार सोहळा; आमदार आशिष जयस्वाल यांची प्रमुख उपस्थिती

भद्रावती : श्रीकृष्ण जन्माष्टमीच्या निमित्ताने भद्रावती शहरात यंदा भव्य-दिव्य उत्सवाचे आयोजन करण्यात आले असून, शहरात उत्सवाचा उत्साह निर्माण झाला आहे. शिवसेनेच्या वतीने आयोजित करण्यात येणाऱ्या या जन्माष्टमी उत्सवात विविध सांस्कृतिक कार्यक्रमांसह चित्रपटसृष्टीतील कलाकारांचे विशेष आकर्षण असणार आहे.

उत्सवाच्या प्रसिद्धीपत्रकानुसार 5 व 6 सप्टेंबर 2026 रोजी हा सोहळा आयोजित करण्यात आला आहे. कार्यक्रमाला आमदार आशिषजी जयस्वाल यांची प्रमुख उपस्थिती राहणार असल्याचे नमूद करण्यात आले आहे. तसेच अभिनेत्री गायत्री दातार यांचे विशेष आकर्षण असून, त्या ‘तुला पाहते रे’ फेम म्हणून जाहिरातीत नमूद करण्यात आल्या आहेत. याशिवाय अभिनेते क्षितिज दाते धर्मवीर चित्रपटांमध्ये एकनाथ शिंदे यांची भूमिका साकारणारे यांचीही विशेष उपस्थिती राहणार असल्याचे पोस्टरमध्ये जाहीर करण्यात आले आहे.

श्रीकृष्ण जन्माष्टमी म्हणजे भक्ती, उत्साह आणि आनंदाचा संगम. त्यामुळे “गोकुळात आनंद, भक्तांच्या हृदयात उत्साह आणि प्रत्येकाच्या ओठांवर एकच जयघोष—जय श्रीकृष्ण!” अशा भक्तिमय वातावरणात भद्रावती शहर दुमदुमणार आहे.

या भव्य आयोजनामागे मुकेश जिवतोडे यांच्या मार्गदर्शनाखाली नगरसेवक महेश मारोतराव जिवतोडे यांच्यासह शिवसेनेचे पदाधिकारी व कार्यकर्ते सक्रिय असल्याचे प्रसिद्धीपत्रकावरून दिसून येते. कार्यक्रमाच्या नियोजनासाठी कार्यकर्त्यांची मोठी फळी सज्ज झाली असून, शहरातील नागरिकांनी आणि श्रीकृष्ण भक्तांनी मोठ्या संख्येने सहभागी व्हावे, असे आवाहन करण्यात आले आहे.

भद्रावतीत कृष्णजन्माचा जल्लोष!

भक्ती, मनोरंजन आणि सांस्कृतिक कार्यक्रमांची मेजवानी देणारा हा उत्सव भद्रावतीच्या सार्वजनिक उत्सवांच्या मालिकेत आकर्षणाचा केंद्रबिंदू ठरण्याची शक्यता आहे. श्रीकृष्णाच्या जयघोषाने भद्रावती नगरी दुमदुमण्यासाठी आता अवघे काही दिवस शिल्लक आहेत.