वरोरा :- वाढदिवस म्हणजे केवळ जल्लोष किंवा शुभेच्छांचा वर्षाव नसून, तो समाजाप्रती असलेली जबाबदारी पार पाडण्याचा दिवस असावा, या उदात्त विचारातून कल्पतरू गणेश मंडळाचे अध्यक्ष चेतन शर्मा यांनी आपला वाढदिवस अत्यंत आगळ्या-वेगळ्या आणि समाजोपयोगी पद्धतीने साजरा केला. वरोरा येथील ‘लोकनेते सुधीरभाऊ मुनगंटीवार सामूहिक अभ्यास केंद्रा’त बालगोपालांच्या उपस्थितीत त्यांनी आनंद व्यक्त केला.
स्व. चंद्रभागाबाई नारायण घुमे बहुउद्देशीय संस्था, वरोरा संचलित जेतवन बुद्ध विहार येथील या अभ्यास केंद्रात चेतन शर्मा यांनी विद्यार्थ्यांसमवेत केक कापून वाढदिवसाचा आनंद द्विगुणित केला. याप्रसंगी त्यांनी उपस्थित सर्व विद्यार्थ्यांना शालेय साहित्याचे संच आणि चॉकलेट्सचे वाटप केले. लहानग्यांच्या चेहऱ्यावरील हा आनंद पाहून उपस्थितांनीही समाधान व्यक्त केले.
शिक्षणाला प्रोत्साहन, सामाजिक उपक्रमांना बळ
कार्यक्रमात उपस्थित मान्यवरांनी आपल्या मनोगतातून या उपक्रमाचे कौतुक केले. “वाढदिवसासारख्या वैयक्तिक आनंदाच्या क्षणांना जेव्हा समाजोपयोगी उपक्रमांची जोड दिली जाते, तेव्हा खऱ्या अर्थाने समाजाचे हित साधले जाते. शैक्षणिक साहित्याचे वाटप करून विद्यार्थ्यांना शिक्षणाच्या प्रवाहात अधिक सक्षमपणे टिकवून ठेवण्याचा हा एक महत्त्वपूर्ण प्रयत्न आहे,” असे मत व्यक्त करण्यात आले.
या उत्साही कार्यक्रमाला संस्थेचे सचिव आशिष घुमे, उपाध्यक्ष संजय दानव, योग शिक्षिका शीतल मिटकर, सामाजिक कार्यकर्ते अमित आसेकर, प्रणय मालू, रवी पटेल आणि स्वयंसेवक चेतन बुरडकर व नूतन बुरडकर यांची प्रमुख उपस्थिती होती. सर्वांनी चेतन शर्मा यांना वाढदिवसाच्या शुभेच्छा देतानाच, त्यांच्या या सामाजिक कार्याची दखल घेत भविष्यातही त्यांच्याकडून अशाच समाजोपयोगी कार्याची अपेक्षा व्यक्त केली.
हा कार्यक्रम केवळ एक वाढदिवस सोहळा न राहता, युवकांनी समाजाप्रती आपली जबाबदारी कशी ओळखावी, याचे एक आदर्श उदाहरण ठरला.
