मुंबई :-महाराष्ट्र राज्याच्या राजकारणात विधान परिषद निवडणुकीच्या पार्श्वभूमीवर सध्या मोठी उलथापालथ पाहायला मिळत आहे. आपल्या आक्रमक शैलीसाठी ओळखले जाणारे प्रहार जनशक्ती पक्षाचे संस्थापक बच्चू कडू यांनी मुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याचा निर्णय घेतल्याची माहिती समोर येत आहे.
👉 ‘धनुष्यबाण’ हाती घेण्यामागची भूमिका.
प्रसारमाध्यमांशी बोलताना बच्चू कडू यांनी स्पष्ट केले की, “मी शेतकरी, मजूर आणि दिव्यांगांच्या हक्कासाठी पुन्हा एकदा धनुष्यबाण हाती घेणार आहे.” त्यांनी पुढे सांगितले की, गेल्या काही दिवसांत मुख्यमंत्री एकनाथ शिंदे यांच्याशी झालेल्या चर्चेत त्यांनी मांडलेले सर्व मुद्दे आणि अटी शिवसेनेने मान्य केल्या आहेत. त्यामुळे कार्यकर्त्यांच्या आणि समाजकार्याच्या हितासाठी त्यांनी हा पाऊल उचलल्याचे दिसते.
👉 मंत्रीपदासाठी नाही, तर दिव्यांगांच्या हक्कासाठी लढा.
बच्चू कडू यांनी आपल्यावरील टीकाकारांना चोख प्रत्युत्तर देताना म्हटले की:
“मला मंत्रीपदाची हाव नाही. जर मला मंत्रीपद हवे असते, तर मी गुवाहाटीला गेलो होतो तेव्हाच ते मागितले असते. लोक मंत्रीपदासाठी ‘फील्डिंग’ लावत होते, तेव्हा मी केवळ दिव्यांग मंत्रालयासाठी भांडत होतो. हाच बच्चू कडू आणि इतरांमधील फरक आहे.”
त्यांनी पुढे सांगितले की, जेव्हा ही राजकीय घडामोड घडत होती, तेव्हा त्यांना याची कल्पनाही नव्हती. “मी संत्र्याच्या बागेला पाणी देत होतो, तेव्हा मला माध्यमांतूनच या हालचालींची माहिती मिळाली,” असेही त्यांनी मिश्किलपणे नमूद केले.
शेतकरी आणि दिव्यांगांचे प्रश्न अग्रक्रमी
एकनाथ शिंदे यांच्यासोबत झालेल्या २४ तासांच्या चर्चेत प्रामुख्याने खालील विषयांवर सहमती झाली आहे:
👉 शेतकरी प्रश्न पेरणीपासून ते कापणीपर्यंतच्या समस्या आणि हमीभावावर सविस्तर चर्चा.
👉 कर्जमाफी शेतकऱ्यांच्या कर्जमाफीचा मुद्दा.
👉 दिव्यांग आणि आदिवासी कल्याण दिव्यांगांसाठी स्वतंत्र व्यवस्था आणि आदिवासींच्या संदर्भातील मागण्या.
👉 ‘प्रहार’ संघटनेचे भविष्य काय ?
पक्ष विलीनीकरणाच्या चर्चेदरम्यान बच्चू कडू यांनी एक महत्त्वाची गोष्ट स्पष्ट केली आहे. प्रहार संघटना ही आहे तशीच कार्यरत राहील. ज्यांना केवळ सामाजिक काम करायचे आहे, त्यांच्यासाठी ‘प्रहार’ हे व्यासपीठ कायम असेल. मात्र, ज्यांना सक्रिय राजकारणात रस आहे, त्यांनी शिवसेनेत प्रवेश करावा, असा पर्याय त्यांनी दिला आहे.
👉 शिवसेनेशी जुने नाते
आपल्या राजकीय प्रवासाची आठवण करून देताना कडू म्हणाले, “माझा राजकीय प्रवास शिवसेनेतूनच सुरू झाला होता. बाळासाहेब ठाकरेंना लिहिलेले पत्र आजही माझ्याकडे आहे. माझा जन्म शिवसेनेत झाला आणि शेवटही शिवसेनेतच व्हावा, अशी माझी इच्छा आहे.”
बच्चू कडू यांच्या या निर्णयामुळे आगामी विधान परिषद आणि विधानसभा निवडणुकांमध्ये शिवसेनेची (शिंदे गट) ताकद वाढण्याची शक्यता वर्तवण्यात येत आहे. आता ‘धनुष्यबाण’ हाती घेऊन बच्चू कडू शेतकऱ्यांच्या आणि दिव्यांगांच्या प्रश्नांवर कशी छाप पाडतात, याकडे सर्वांचे लक्ष लागले आहे.
🙏 जय विदर्भ 🙏
