वणी :- विकासकामांच्या घोषणा आणि प्रशासकीय उदासीनतेचा प्रत्यय आणून देणारी एक अत्यंत संतापजनक व तितकीच वेदनादायी घटना समोर आली आहे. वणी तालुक्यातील नांदेपेरा ते शेलू रस्त्याच्या अत्यंत दयनीय आणि खड्डेमय अवस्थेमुळे एका निष्पाप ग्रामस्थाचा अपघातात बळी गेला आहे. या दुर्दैवी घटनेनंतर संतप्त झालेल्या महाराष्ट्र नवनिर्माण सेनेने (मनसे) प्रशासनाविरोधात आक्रमक पवित्रा घेतला असून, ३ सप्टेंबर २०२६ रोजी होणारे नियोजित आंदोलन ग्रामस्थाच्या शोकसागरामुळे तात्पुरते स्थगित करण्यात आले आहे.
नांदेपेरा ते शेलू रस्ता सध्या पूर्णपणे उद्ध्वस्त झाला असून, यावर केवळ खड्ड्यांचे साम्राज्य पसरले आहे. या मार्गावरून प्रवास करणे म्हणजे वाहनचालकांसाठी रोजचा मृत्यूचा खेळ बनला आहे.
नित्यनियमाचे प्रवासी :- या मार्गावर शेतकरी, शाळकरी विद्यार्थी, महिला, ज्येष्ठ नागरिक आणि शेलू येथील प्रसिद्ध मंदिरामध्ये दर्शन घेण्यासाठी येणाऱ्या भाविकांची सतत मोठी वर्दळ असते.
प्रशासनाची टोलवाटोलोल :-रस्त्याची अवस्था बिकट झाल्यामुळे यापूर्वी मनसेने अनेकदा प्रशासनाला निवेदने दिली, आंदोलनाचे इशारे दिले; परंतु नेहमीप्रमाणे प्रशासनाने याकडे सोयीस्कर दुर्लक्ष केले.
शोककळा आणि प्रशासनाला अंतिम इशारा
शेलू येथील ग्रामस्थाच्या अपघाती मृत्यूमुळे संपूर्ण परिसरात शोककळा पसरली आहे. या दुःखद पार्श्वभूमीवर मनसेचे नेते फाल्गुन गोहोकार यांनी वणी पोलीस ठाण्याचे ठाणेदार यांना अधिकृत निवेदन देत ३ सप्टेंबरचे आंदोलन तूर्तास स्थगित केल्याचे जाहीर केले.
मात्र, हा निर्णय म्हणजे माघार नसून वादळापूर्वीची शांतता आहे, असा स्पष्ट इशारा मनसेने दिला आहे. प्रशासनाने तातडीने या रस्त्याची पाहणी करून दुरुस्तीचे काम युद्धपातळीवर सुरू करावे, अन्यथा येत्या काळात याहून अधिक तीव्र आणि आक्रमक जनआंदोलन छेडले जाईल, असा सज्जड दम फाल्गुन गोहोकार यांनी प्रशासनाला दिला आहे. आता या इशाऱ्यानंतर प्रशासन खडबडून जागे होणार का, की आणखी एखाद्या जीव गेल्यानंतर पावले उचलली जाणार, हे पाहणे महत्त्वाचे ठरणार आहे.
