मुंबई | विशेष प्रतिनिधी :- महाराष्ट्र राज्य विधानमंडळाच्या नुकत्याची चालू असलेल्या पावसाळी अधिवेशनामध्ये ऊर्जामंत्री देवेंद्र फडणवीस (देवाभाऊ) यांनी राज्यातील वीज क्षेत्रातील ऐतिहासिक बदलांची घोषणा केली आहे. “लोडशेडिंगमुक्त महाराष्ट्र” संकल्पनेची अंमलबजावणी करत असतानाच, आता राज्याने विक्रमी वीजपुरवठ्याचा नवा इतिहास रचला आहे, असे प्रतिपादन त्यांनी केले.
शेतकऱ्यांसाठी दिवसा वीज :- एक क्रांती
पावसाळी अधिवेशनात कृषी क्षेत्राच्या विकासावर भर देत ऊर्जामंत्र्यांनी स्पष्ट केले की, राज्याच्या कानाकोपऱ्यातील शेतकऱ्यांच्या शेतापर्यंत आता दिवसा उजेडात वीजपुरवठा सुनिश्चित करण्यात आला आहे. शेतकरी बांधवांना रात्रीच्या वेळी पिकांना पाणी देण्यासाठी होणारी पायपीट आणि वाढता धोका लक्षात घेऊन, ‘मुख्यमंत्री सौर कृषी वाहिनी’ योजनेच्या माध्यमातून आता दिवसा वीज देण्याचा निर्णय यशस्वीपणे राबवला जात आहे. यामुळे ग्रामीण महाराष्ट्राच्या अर्थव्यवस्थेला मोठी उभारी मिळणार आहे.
अधिवेशनादरम्यान बोलताना देवेंद्र फडणवीस म्हणाले की, “केवळ घोषणा न करता आम्ही प्रत्यक्ष कृतीवर भर दिला आहे. राज्यातील उद्योगांना अखंड वीजपुरवठा आणि शेतकऱ्यांना दिवसा वीज पुरवणे हे आमचे ध्येय होते, जे आता सत्यात उतरत आहे. या विक्रमी वीजपुरवठ्यामुळे महाराष्ट्राच्या औद्योगिक आणि कृषी विकासाला मोठी नवी ऊर्जा मिळाली आहे.”
लोडशेडिंगला पूर्णविराम :- राज्याने ऊर्जेच्या बाबतीत स्वावलंबन गाठले असून, लोडशेडिंगमुक्त राज्याच्या दिशेने वाटचाल पूर्ण झाली आहे.
सौर ऊर्जेचा वापर :- सौर कृषी वाहिनी योजनेद्वारे वीज निर्मितीवर भर दिल्याने भारनियमनाचे संकट कायमचे दूर झाले आहे.
अखंड वीज पुरवठा :- वीज कंपन्यांची कार्यक्षमता वाढवून विक्रमी वीज पुरवठा साध्य करण्यात सरकारला यश आले आहे.
विरोधी पक्षांच्या प्रश्नांना उत्तर देताना फडणवीस यांनी स्पष्ट केले की, महाराष्ट्राचे भविष्य उज्वल करण्याच्या दृष्टीने ऊर्जा विभाग कटिबद्ध आहे. येत्या काळात राज्याची वीज क्षमता आणखी वाढवण्यासाठी नवीन प्रकल्प उभारले जाणार असून, महाराष्ट्र हे देशातील ‘ऊर्जा हब’ बनवण्याचा सरकारचा मानस आहे.
