विद्यार्थी, उद्योजक अन् प्रवाशांचा ‘प्रवास-प्रवास’ थांबणार कधी?
चंद्रपूर :- देशभरात विकासाचे वारे वाहत असताना, औद्योगिक नगरी म्हणून ओळखल्या जाणाऱ्या चंद्रपूर जिल्ह्याला अजूनही हक्काच्या हवाई संपर्कापासून वंचित राहावे लागत आहे. विद्यार्थ्यांचा मौल्यवान वेळ, उद्योजकांची व्यावसायिक गरज आणि सामान्य नागरिकांची होणारी परवड थांबवण्यासाठी आता भाजपचे ज्येष्ठ नेते तथा आमदार सुधीर मुनगंटीवार यांनी थेट नवी दिल्लीत धडक दिली आहे. केंद्रीय नागरी विमान वाहतूक मंत्री किंजरापू राममोहन नायडू यांची भेट घेऊन त्यांनी मोरवा विमानतळाचा ‘उडान’ (UDAN) योजनेत समावेश करण्याची आणि तातडीने चंद्रपूर-पुणे, चंद्रपूर-मुंबई व चंद्रपूर-दिल्ली नियमित विमानसेवा सुरू करण्याची अत्यंत आग्रही मागणी केली आहे.
काळाची गरज: का हवे चंद्रपूरला थेट हवाई उड्डाण?
- औद्योगिक प्रगतीला ब्रेक: चंद्रपूर हा राज्याचा पॉवर आणि इंडस्ट्रियल हब आहे. देशातील नामवंत उद्योजक व गुंतवणूकदारांना येण्या-जाण्यासाठी थेट विमानसेवा नसल्याने विकासाच्या गतीला मोठा ब्रेक लागला आहे.
- विद्यार्थी व कर्मचाऱ्यांची हेळसांड: उच्च शिक्षण घेणाऱ्या विद्यार्थ्यांना आणि शासकीय कर्मचाऱ्यांना कामासाठी नागपूर किंवा इतर शहरांतून पायपीट करावी लागते. यामुळे प्रचंड शारीरिक व मानसिक त्रास सहन करावा लागतो.
- पर्यटनाला नवी झेप: ताडोबा-अंधारी व्याघ्र प्रकल्पाकडे आकर्षित होणारे देश-विदेशातील पर्यटक आणि वन्यजीवप्रेमी थेट चंद्रपूरला पोहोचू शकले, तर जिल्ह्याच्या पर्यटन अर्थव्यवस्थेला एक नवी झेप मिळेल.
दिल्ली दरबारी सकारात्मक प्रतिसाद; आशेचा नवा किरण!
आमदार सुधीर मुनगंटीवार यांनी मांडलेल्या या अत्यंत मार्मिक आणि जनहिताच्या भूमिकेची दखल घेत केंद्रीय मंत्री किंजरापू राममोहन नायडू यांनी या मागणीला सकारात्मक प्रतिसाद दिला आहे. तसेच, यावर तातडीने आवश्यक कार्यवाही करण्याचे आश्वासन दिले आहे. या आश्वासनामुळे आता चंद्रपूरच्या विकासाला नवे पंख मिळतील आणि विमानसेवेचा लांबलेला प्रश्न मार्गी लागेल, असा मजबूत विश्वास जनमानसात निर्माण झाला आहे.
“चंद्रपूरच्या औद्योगिक, शैक्षणिक आणि पर्यटन विकासाला नवी झेप देण्यासाठी मोरवा विमानतळावरून नियमित हवाई सेवा सुरू होणे ही आता काळाची गरज बनली आहे. दिल्ली दरबारी झालेल्या या पाठपुराव्यामुळे चंद्रपूरच्या हवाई संपर्काला लवकरच नवी दिशा मिळेल.” – सुधीर मुनगंटीवार, आमदार
