वरोरा :- गटारांच्या दुरावस्थेकडे प्रशासनाचे डोळे कधी उघडणार? नागरिकांच्या आरोग्याशी खेळ सुरूच!
प्रभाग क्रमांक ६ मधील राम मंदिर परिसरात गटार व्यवस्थेची झालेली दयनीय अवस्था आता सहनशीलतेच्या पलीकडे गेली आहे. शाह आणि गोलेच्छा यांच्या घरासमोरील मुख्य रस्त्यावर सांडपाणी ओसंडून वाहत असल्याने नागरिकांचे जनजीवन विस्कळीत झाले आहे. या पार्श्वभूमीवर, नगरसेविका सौ. आशा किशोर आसेकर यांनी या समस्येची गंभीर दखल घेत प्रशासनाला तातडीने जागे करण्याचे पाऊल उचलले आहे.
प्रशासनाच्या कारभारावर संताप
प्रत्येक पावसाळ्यात याच समस्यांचा सामना करावा लागणे हे प्रशासनाच्या अपयशाचे लक्षण आहे.
🟡 रस्त्यावर साचलेले दूषित पाणी नागरिकांच्या आरोग्यासाठी धोकादायक ठरत आहे.
🟡 अनेकदा तक्रारी करूनही प्रशासनाकडून कोणतीही कायमस्वरूपी उपाययोजना केलेली नाही.
🟡 स्थानिकांची गैरसोय पाहता प्रशासनाचे डोळे आता कधी उघडणार, असा जळजळीत सवाल सौ. आशा किशोर आसेकर यांच्या मार्गदर्शनाखाली उपस्थित केला जात आहे.
नगरसेविका सौ. आशा किशोर आसेकर यांची आक्रमक भूमिका
“आणखी किती पावसाळे नागरिकांनी अशाच नरकयातना सोसून काढायचे?” असा खडा सवाल नगरसेविका सौ. आशा किशोर आसेकर यांनी प्रशासनाला विचारला आहे. केवळ थातूर-मातूर उपाययोजना न करता, संबंधित नगरसेवक आणि प्रशासनाने तातडीने या ठिकाणी पाहणी करून या गटारांच्या समस्येवर कायमस्वरूपी तोडगा काढावा, अन्यथा या प्रश्नावर तीव्र आंदोलनाचा पवित्रा घेतला जाईल, असा इशारा देण्यात आला आहे.
आज नगरपरिषद वरोराचे मुख्यअधिकारी,स्वच्छता विभागाचे, पाणीपुरवठा विभाग, बांधकाम विभागाचे तसेच आरोग्य विभागाचे कर्मचारी प्रभागात येऊन पाहणी करून लवकरात लवकर यावर मार्ग काढण्याचे आश्वासन दिले आहे.
