काठमांडू/वरोरा :- अभिषेक किशोर भागडे
आपल्या आक्रमक कार्यशैलीसाठी आणि सामान्यांच्या न्याय्य हक्कासाठी लढणारे लोकनेते, माजी राज्यमंत्री आमदार बच्चू कडू यांनी पुन्हा एकदा आपल्या अदम्य साहसाचा परिचय दिला आहे. भारतरत्न डॉ. बाबासाहेब आंबेडकर यांच्या जयंतीच्या पूर्वसंध्येला, बच्चू कडू यांनी जगातील सर्वोच्च शिखर असलेल्या माऊंट एव्हरेस्टचा ‘बेस कॅम्प’ (५३६४ मीटर) यशस्वीपणे सर करून एक नवा इतिहास रचला आहे. अशा प्रकारची कामगिरी करणारे ते महाराष्ट्रातील कदाचित पहिलेच लोकप्रतिनिधी ठरले आहेत.
👉 *हाडे गोठवणारी थंडी अन् ऑक्सिजनची कमतरता*
१३ एप्रिल २०२६ रोजी पूर्ण झालेली ही मोहीम अत्यंत खडतर होती. ‘द अल्पायनिस्ट’ संस्थेच्या माध्यमातून आणि प्रख्यात एव्हरेस्टवीर भगवान चवले यांच्या मार्गदर्शनाखाली हा ट्रेक पार पडला. सलग ८ दिवस चाललेल्या या चढाईत कडू यांनी आपल्या मुलासोबत (देवा कडू) कोणतीही ‘व्हीआयपी’ सुविधा न घेता एका सामान्य गिर्यारोहकाप्रमाणे प्रवास केला.
जसजशी उंची वाढत गेली, तसतसे ऑक्सिजनचे प्रमाण कमी होत जाऊन ते केवळ ४५ टक्क्यांवर उरले होते. उणे १५ अंश सेल्सिअस इतकी हाडे गोठवणारी थंडी आणि श्वसनाचा त्रास अशा प्रतिकूल परिस्थितीतही त्यांनी दररोज १२ ते १४ किलोमीटरची पायपीट केली. मोहिमेच्या शेवटच्या दिवशी त्यांनी तब्बल १७ किलोमीटरचा खडतर प्रवास करून बेस कॅम्पवर तिरंगा फडकवला.
*संविधान आणि भगवद्गीतेला मोहीम समर्पित*
डॉ. बाबासाहेब आंबेडकर यांच्या जयंतीचे औचित्य साधून बच्चू कडू यांनी ही मोहीम ‘भारतीय संविधान’ आणि ‘श्रीमद्भगवद्गीता’ यांना समर्पित केली. या मोहिमेत त्यांच्यासोबत मुलगा देवा कडू, अभियान प्रमुख महेश बडे, केतन हिवंज आणि इतर १४ सवंगडी सहभागी झाले होते.
👉 *महाराष्ट्रातील गड-किल्ल्यांसाठी नवा संकल्प*
नेपाळमध्ये गिर्यारोहकांसाठी असलेल्या जागतिक दर्जाच्या सोयीसुविधा पाहून कडू यांनी महाराष्ट्रातील गड-किल्ल्यांबाबतही आपली इच्छा व्यक्त केली. “नेपाळप्रमाणेच आपल्या महाराष्ट्रातील ऐतिहासिक गड-किल्ल्यांवर ट्रेकिंगसाठी उत्तम सुविधा निर्माण व्हायला हव्यात, जेणेकरून राज्यातील पर्यटन आणि साहसी खेळांना चालना मिळेल,” असे त्यांनी यावेळी नमूद केले.
५४ वर्षांचे वय असूनही त्यांनी दाखवलेली ही जिद्द आणि शारीरिक क्षमता तरुणांसाठी प्रेरणादायी ठरली आहे. त्यांच्या या यशाबद्दल संपूर्ण विदर्भातून आणि राजकीय वर्तुळातून त्यांच्यावर अभिनंदनाचा वर्षाव होत आहे.
🙏 जय विदर्भ🙏
