🛑🙏राणी दुर्गावती चौक परिसरातील व प्रभागातील समस्यांकडे तातडीने लक्ष देण्याची मागणी🙏🛑

वरोरा : शहरातील राणी दुर्गावती चौक व परिसराचे  सौंदर्यीकरण तसेच प्रभागातील समस्या कडे व नागरिकांना मूलभूत सुविधा उपलब्ध करून देण्याबाबत नगर परिषद प्रशासनाने तातडीने पावले उचलावीत, अशी मागणी नगरसेविका सौ. रोशनी संदीप भडके यांनी मुख्याधिकारी, नगर परिषद वरोरा तथा नगराध्यक्ष वरोरा यांना दिलेल्या निवेदनातून केली आहे.

निवेदनात नमूद केल्याप्रमाणे, वरोरा शहरातील राणी दुर्गावती चौक व परिसर हा शहरातील अत्यंत महत्त्वाचा व मुख्य वाहतूक केंद्रबिंदू आहे. येथे दररोज मोठ्या प्रमाणात नागरिकांची व वाहनांची वर्दळ असते. मात्र या परिसरात आवश्यक नागरी सुविधा अपुऱ्या असल्यामुळे नागरिकांना अनेक गैरसोयींचा सामना करावा लागत आहे. त्यामुळे स्थानिक स्वराज्य संस्थेने या समस्यांकडे गांभीर्याने लक्ष देण्याची गरज असल्याचे निवेदनात म्हटले आहे.

निवेदनातील मुख्य मागण्या पुढीलप्रमाणे :

1. राणी दुर्गावती चौकाचे नियोजनबद्ध सौंदर्यीकरण करून हरित पट्टा विकसित करावा.
2. चौकात व परिसरात उच्च क्षमतेचे हायमास्ट लाईट बसवून प्रकाश व्यवस्था मजबूत करावी.
3. परिसरातील रस्त्यांची दुरुस्ती करून आवश्यकतेनुसार नवीन डांबरीकरण करावे.
4. नाली बांधकाम, पावसाच्या पाण्याचा निचरा आणि नियमित साफसफाईची प्रभावी व्यवस्था करावी.
5. परिसरातील विद्युत तारा सुरक्षित व नियमानुसार व्यवस्थित कराव्यात तसेच आवश्यकतेनुसार नवीन स्ट्रीट लाईट बसवाव्यात.
6. चौक परिसरात वृक्षारोपण करून पर्यावरणपूरक हरित पट्टा तयार करावा.
7. नियमित साफसफाई व कचरा व्यवस्थापनाची शाश्वत व्यवस्था करावी.
8. नागरिकांच्या सोयीसाठी सार्वजनिक शौचालय उभारावे किंवा उपलब्ध सुविधा दुरुस्त करून कार्यान्वित कराव्यात.

या सर्व बाबी नागरिकांच्या मूलभूत नागरी हक्कांशी तसेच सार्वजनिक आरोग्य व सुरक्षिततेशी संबंधित असल्याने प्रशासनाने तातडीने पाहणी करून आवश्यक प्रशासकीय व तांत्रिक कार्यवाही करावी, अशी विनंती नगरसेविका सौ. रोशनी संदीप भडके यांनी केली आहे.

🙏जय विदर्भ🙏