🛑🙏२ लाखांची कर्जमाफी म्हणजे शेतकऱ्यांच्या जखमेवर मीठ; सातबारा पूर्ण कोरा करा – खासदार  प्रतिभाताई धानोरकर 🙏🛑 

चंद्रपूर : राज्य सरकारने मांडलेल्या अर्थसंकल्पावर चंद्रपूर-वणी-आर्णी लोकसभा मतदारसंघाच्या खासदार यांनी जोरदार हल्लाबोल करत तीव्र शब्दांत टीका केली आहे. सरकारने जाहीर केलेली २ लाख रुपयांची कर्जमाफी ही बळीराजाच्या जखमेवर मीठ चोळण्यासारखी असल्याचे सांगत शेतकऱ्यांचा सातबारा पूर्णपणे कोरा करण्याची मागणी त्यांनी केली आहे.

खासदार धानोरकर म्हणाल्या की, महायुती सरकारचा अर्थसंकल्प हा केवळ आकड्यांची जादुगिरी आणि घोषणांचा पाऊस आहे. आजचा शेतकरी लाखो रुपयांच्या कर्जाखाली दबलेला असताना केवळ २ लाख रुपयांची कर्जमाफी जाहीर करून सरकार स्वतःची पाठ थोपटून घेत आहे. ही मदत शेतकऱ्यांच्या जखमेवर मीठ चोळण्यासारखी असून खरा दिलासा देण्यासाठी शेतकऱ्यांचा सातबारा पूर्णपणे कोरा करणे आवश्यक आहे, असे त्यांनी स्पष्ट केले.

विदर्भातील कापूस, सोयाबीन आणि धान उत्पादक शेतकऱ्यांना हमीभाव देण्याबाबत सरकारने पुन्हा एकदा मौन बाळगल्याचा आरोपही त्यांनी केला. शेतीमालाला योग्य भाव नाही, तर दुसरीकडे तुटपुंजी कर्जमाफी देऊन सरकार आपली जबाबदारी झटकत असल्याचे त्यांनी म्हटले.

याशिवाय सुशिक्षित तरुणांच्या हाताला काम देण्याऐवजी केवळ डिजिटल स्वप्नांचे आश्वासन देऊन बेरोजगारांची थट्टा करण्यात आल्याची टीका त्यांनी केली. महागाईने होरपळणाऱ्या मध्यमवर्गीय कुटुंबांना व गृहिणींना दिलासा देण्याऐवजी सरकारने केवळ कागदी योजनांचे गाजर दाखवले असल्याचेही त्यांनी नमूद केले.

चंद्रपूर-वणी-आर्णी लोकसभा क्षेत्रासह संपूर्ण विदर्भाच्या विकासाबाबत अर्थसंकल्पात कोणतीही ठोस तरतूद नसल्याचा आरोप करत त्यांनी नाराजी व्यक्त केली. सिंचन प्रकल्प, औद्योगिक विकास आणि स्थानिक पायाभूत सुविधांसाठी कोणताही विशेष निधी न दिल्याने विदर्भाच्या तोंडाला पुन्हा एकदा पाने पुसल्याची टीका त्यांनी केली.

हा अर्थसंकल्प दिशाहीन आणि जनविरोधी असून कष्टकरी, शेतकरी आणि तरुणांचा विश्वासघात करणारा असल्याचा आरोप करत यांनी सरकारचा जाहीर निषेध केला.

🙏जय विदर्भ🙏