🙏🛑 ‘पीएम’ लिहिलेल्या वाहनाने बॅरिकेड तोडले; स्वयंघोषित पंतप्रधान अडचणीत 🛑🙏

वरोरा :- शहरात एक धक्कादायक प्रकार समोर आला असून स्वतःला “पंतप्रधान” म्हणून घोषित करणाऱ्या व्यक्तीच्या वाहनाने वाहतूक नियंत्रणासाठी लावलेले बॅरिकेड तोडून पळ काढल्याची घटना घडली. या घटनेमुळे शहरात काही काळ गोंधळाचे वातावरण निर्माण झाले.

मिळालेल्या माहितीनुसार, शहरातील रत्नमाला–चौक परिसरात वाहतूक नियंत्रणासाठी पोलिसांनी बॅरिकेड उभारले होते. दरम्यान, “पीएम” असा उल्लेख असलेले वाहन वेगाने येत बॅरिकेडला धडक देत पुढे निघून गेले. घटनेनंतर उपस्थित नागरिक आणि पोलिसांमध्ये खळबळ उडाली.

संबंधित व्यक्तीने यापूर्वी स्वतःला देशाचा पंतप्रधान घोषित करत विविध अधिकाऱ्यांकडे अर्ज सादर केल्याची माहिती समोर आली आहे. त्याच्या वाहनावर “पीएम” असा उल्लेख करून तो विनापरवाना फिरत असल्याने नागरिकांमध्ये संभ्रमाचे वातावरण निर्माण झाले होते. या प्रकाराची माहिती लागतात जमलेली जनता घटनास्थळी  पोहोचल्यानंतर प्रकरण चर्चेत आले.

घटनेनंतर पोलिसांनी तत्काळ हालचाल करत संबंधित वाहनाचा शोध सुरू केला. शहरातील विविध सीसीटीव्ही कॅमेऱ्यांची तपासणी करण्यात येत असून, वाहनाचा क्रमांक आणि चालकाची ओळख पटवण्याचे काम सुरू आहे. वाहतूक नियमांचे उल्लंघन आणि बॅरिकेड तोडल्याप्रकरणी संबंधितावर कठोर कारवाई करण्यात येणार असल्याचे पोलिसांनी सांगितले.

दरम्यान, या घटनेमुळे शहरात चर्चेला उधाण आले असून, पोलिस प्रशासनाने नागरिकांना अफवांवर विश्वास न ठेवण्याचे आवाहन केले आहे. तसेच अशा प्रकारच्या घटनांची माहिती त्वरित पोलिसांना देण्याचेही आवाहन करण्यात आले आहे.