वरोरा : – अभिषेक भागडे
जाती-धर्माच्या भिंतींना तडा देत आणि माणुसकीचा धर्म सर्वात श्रेष्ठ असल्याचा हुंकार भरत, वरोरा येथील नवदुर्गा उत्सव मंडळाने एक नवा इतिहास रचला आहे. राजीव गांधी वॉर्डातील या मंडळाने रमजान ईदच्या निमित्ताने चक्क शिरखुर्मा (शेवया) वाटप करून समाजात ‘ऐक्याचा गोडवा’ पेरला आहे. सध्याच्या काळात जिथे द्वेषाचे राजकारण चालते, तिथे वरोऱ्यातील तरुणांनी दिलेला हा संदेश विरोधकांच्या डोळ्यांत अंजन घालणारा ठरला आहे.
संस्कृतीचा सन्मान, एकोप्याचा नवा अध्याय!
सण कोणताही असो, तो आनंद वाटण्यासाठी असतो, हेच या उपक्रमातून सिद्ध झाले. नवदुर्गा उत्सव मंडळाच्या या उपक्रमामुळे संपूर्ण परिसरात सामाजिक सौहार्दाचे आणि बंधुभावाचे वातावरण निर्माण झाले आहे. “आम्ही फक्त दुर्गा पूजाच साजरी करत नाही, तर आमच्या मुस्लीम बांधवांच्या ईदमध्येही तितक्याच आनंदाने सहभागी होतो,” अशी भावना यावेळी मंडळाच्या वतीने व्यक्त करण्यात आली.
दिगग्जांची उपस्थिती; वरोरा पॅटर्नची चर्चा
या ऐतिहासिक क्षणाचे साक्षीदार होण्यासाठी अनेक सामाजिक कार्यकर्ते आणि तरुण मोठ्या संख्येने एकवटले होते. यामध्ये प्रामुख्याने संजय दानव, आशिष घुमे, अजय बावणे, देवा नगराळे, अक्षय टेनपे, राहील पठाण, मयूर ठाकरे, शाहरुख शेख, तन्वीर शेख, तौफिक शेख यांच्यासह मंडळाच्या कार्यकर्त्यांनी हिरीरीने भाग घेतला. हिंदू आणि मुस्लीम तरुणांनी खांद्याला खांदा लावून केलेल्या या शिरखुर्मा वाटपाने वरोरा शहरात एकात्मतेचा एक नवा ‘ब्रँड’ तयार केला आहे.
> “माणुसकीचा धर्म हाच खरा धर्म!”
> “समाजाला तोडणाऱ्या शक्तींना हे चोख प्रत्युत्तर आहे. उत्सव हे फक्त धार्मिक विधी नसून ते माणसांना जोडण्याचे माध्यम आहेत,” अशी प्रतिक्रिया उपस्थित नागरिकांनी दिली.
नागरिकांकडून कौतुकाचा वर्षाव
शहरातील नागरिकांनी या उपक्रमाचे उस्फूर्त स्वागत केले आहे. “असे उपक्रम केवळ वॉर्डापुरते मर्यादित न राहता संपूर्ण देशासाठी आदर्श ठरावेत,” अशी अपेक्षा सर्वसामान्य जनतेतून व्यक्त होत आहे. नवदुर्गा उत्सव मंडळाने दाखवलेल्या या धाडसामुळे आणि विचारांच्या स्पष्टतेमुळे त्यांचे सर्वत्र अभिनंदन होत आहे.
🙏जय विदर्भ 🙏
