स्वतंत्र विदर्भ न्यूज पोर्टल — विशेष रिपोर्ट
२७ वर्षे अपूर्णच! सिंचन प्रकल्पांचा निधी नेमका कुठे अडकला? वरोरा मतदारसंघातील शेतकऱ्यांचा संताप वाढला
वरोरा : वरोरा–भद्रावती विधानसभा क्षेत्रातील नागरिकांना आरोग्य, शिक्षण आणि रोजगाराबरोबरच सिंचनाच्या गंभीर समस्यांना सामोरे जावे लागत आहे. तूमगाव येथील पाझर तलावाचे काम तब्बल २७ वर्षांपासून अपूर्ण असून या प्रकल्पामुळे शेतकरी क्षेत्रातील पिकांना अपेक्षित सिंचन मिळत नाही. तूमगाव, तोंडाळा, खापरी आणि डोंगराळा परिसरातील ग्रामस्थांनी अनेकदा निवेदन देऊन लक्ष वेधले असले तरी प्रकल्प तांत्रिक अडचणींच्या जंजाळात अडकून आहे.
मसुदेकी प्रकल्पाचे उदाहरणही चिंताजनक:
पंचवीस वर्षांपूर्वी योजनेला मंजुरी मिळाली तरी प्रत्यक्ष काम सुरू होऊ शकले नाही. पूर्वीच्या कार्यकाळात प्रकल्प मार्गी लागेल अशी आशा निर्माण झाली होती; मात्र निधीअभावी काम ठप्प झाले. यामुळे शेतकऱ्यांना दुष्काळी परिस्थितीचा सामना करावा लागत आहे.
स्थानिक समस्या तशाच — रोजगारही नाही, सिंचनही नाही
बराच काळ उलटूनही तूमगाव, तोंडाळा, खापरी, तोंडाळा या गावांतील पाण्याची टंचाई जशीच्या तशी आहे. तलावाचे काम पूर्ण न झाल्याने कालव्यांची स्थिती बिकट झाली आहे आणि पाणीसाठा होण्याआधीच पिके वाळत चालली आहेत.
—
आमदार करण देवतळे यांची नाराजी — ३० वर्षांपूर्वी जमीन संपादित, तरी प्रकल्प सुरूच नाही!
आमदार देवतळे यांनी प्रकल्पातील विलंबाबद्दल तीव्र नाराजी व्यक्त केली. त्यांनी सांगितले—
> “भद्रावती तालुक्यातील निपाणे टेंढ्रो प्रकल्पासाठी ३० वर्षांपूर्वी जमीन संपादित केली. मात्र आजतागायत प्रकल्प सुरू झाला नाही. प्रकल्पांसाठी नोकर्याही मिळाल्या नाहीत. प्रत्येक प्रकल्पाला लाखो रुपयांचा निधी मिळूनही कामे प्रलंबित राहिली. जलसंपदा विभागातील पदे रिक्त आहेत, त्याचप्रमाणे प्राधान्याच्या जागादेखील रिक्त आहेत. त्यामुळे प्रकल्पांमध्ये उशीर होतो.”
त्यांनी पुढे सांगितले की, रिक्त पदे भरून काढण्यासाठी शासनाने तत्काळ पावले उचलली नाहीत तर परिस्थिती आणखी बिकट होईल.
—
जनतेचा थेट प्रश्न — जबाबदार कोण?
शेतकऱ्यांमध्ये रोष वाढत असून त्यांचा थेट प्रश्न असा आहे :
२७ वर्षांपासून अपूर्ण सिंचन प्रकल्पांचा निधी कुठे जातोय? जबाबदारी कोण स्वीकारणार?
स्थानिकांनी या प्रकल्पांवर तातडीने काम सुरू करण्याची मागणी केली असून, पाण्यावाचून कोरड्या पडणाऱ्या शेतांमुळे त्यांना आर्थिक फटका बसत आहे.
—🙏 जय विदर्भ 🙏— बातमी आणि जाहिरातीसाठी संपर्क साधा. ☎️ 9673574711 ☎️8329889732
