वरोरा :- वरोरासारख्या छोट्या शहरातून जिद्दीच्या जोरावर जिथे स्वप्ने पाहिली जातात, तिथे वरोऱ्याची कन्या कुमारी ईश्वरी विलास राऊत हिने आपल्या खेळाने राज्याच्या क्रीडा नकाशावर स्वतःची मोहोर उमटवली आहे. शालेय जीवनापासूनच खेळाची आवड जोपासणाऱ्या ईश्वरीने आपल्या आक्रमक खेळाच्या जोरावर थेट ‘साई’ (Sports Authority of India) पर्यंत मजल मारली आहे. आता भारतीय संघात निवड झाली आहे.
💠 शालेय जीवनापासूनच ‘विजेता’ प्रवास 💠
ईश्वरीचे प्राथमिक ते माध्यमिक शिक्षण वरोऱ्यातील लोकमान्य इंग्लिश मीडियम स्कूलमध्ये झाले. शाळेत असतानाच तिने आपल्या खेळातील कौशल्याची चुणूक दाखवून दिली होती. शिस्त आणि सरावाच्या जोरावर तिने १४ वर्षांखालील आणि १७ वर्षांखालील महाराष्ट्र संघात स्थान मिळवले, हे तिच्या गुणवत्तेचे मोठे यश आहे.
💠 यशामागे भक्कम पाठबळ 💠
ईश्वरीच्या या यशात अनेकांचा मोलाचा वाटा आहे. तिला घडवण्यात वरोरा स्पोर्ट्स फाउंडेशन आणि लोकशिक्षण संस्था, वरोडा यांचे योगदान अत्यंत महत्त्वाचे ठरले. खेळाच्या मैदानात आवश्यक असलेले संस्कार आणि व्यासपीठ या संस्थांनी ईश्वरीला उपलब्ध करून दिले. यासोबतच, ईश्वरीच्या पाठीशी खंबीरपणे उभे राहिलेले तिचे आई-वडील आणि सातत्याने योग्य मार्गदर्शन करणारे तिचे कोच यांच्यामुळेच ती आज एका मोठ्या उंचीवर पोहोचली आहे.
💠 आता लक्ष्य ‘साई’चे मैदान 💠
सध्या ईश्वरी विशाखापट्टणम येथील प्रतिष्ठित ‘साई’ (SAI) क्रीडा प्रबोधिनीत प्रशिक्षण घेत आहे. देशातील अव्वल दर्जाच्या प्रशिक्षकांकडून बारकावे शिकत असताना, ईश्वरी आता भविष्यातील मोठ्या स्पर्धांसाठी स्वत:ला तयार करत आहे. तिच्या या आक्रमक शैलीने आणि जिद्दीने ती भविष्यात भारताचे नाव नक्कीच उंचावेल, असा विश्वास क्रीडा वर्तुळातून व्यक्त केला जात आहे.
वरोरा शहरासाठी अभिमानाची गोष्ट असलेल्या ईश्वरीला पुढील वाटचालीस खूप खूप शुभेच्छा!
