🛑🙏हिंदूंचे संकुचित होणे हे देशासमोर मोठे संकट :- संत अविनाश महाराज,आपापसातील मतभेद विसरून एकत्र येण्याचे केले आवाहन. 🙏🛑

वरोरा : – अभिषेक भागडे
हिंदूंनी एकत्र येणे याचा अर्थ कोणत्याही धर्माच्या, पंथाच्या विरोधात जाणे असा होत नाही. आज देशाच्या नऊ राज्यात हिंदू अल्पसंख्यांक झाला आहे. देशाच्या सीमा हिंदू विरहित होत आहेत. हा देशासमोर मोठा धोका आहे. हिंदूंचे संकुचित होणे हे देशासमोर मोठे संकट आहे. त्याग आणि समर्पण वृत्तीचे प्रतीक असलेला हिंदू राहिला, तरच देश टिकेल. हिंदू धर्मियांच्या हातानेच देश व देव सेवा घडेल. देश सुरक्षित राहण्यासाठी सर्व हिंदूंनी आपापसातील मतभेद विसरून एकत्र यावे असा आवाहन वंधली येथील संत हभप अविनाश महाराज भोयर यांनी काढले.
वरोडा येथील ओमनगरच्या प्रांगणात झालेल्या विशाल हिंदू संमेलनात ते बोलत होते.
यावेळी व्यासपीठावर हिंदू संमेलनाचे संयोजक ऋषी मडावी,राष्ट्रीय स्वयंसेवक संघाचे विभाग प्रचारक डॉक्टर दीनदयाल कावरे हे प्रमुख वक्ते म्हणून उपस्थित होते.
हिंदू जागृतीच्या दिशेला नवी ऊर्जा व चेतना प्रदान करण्याच्या उद्देशाने सर्व सकल हिंदू समाजाच्या वतीने सनातन संस्कृती व धर्म आणि सामाजिक ऐक्याचे प्रतीक असलेले हे विशाल हिंदू संमेलन आयोजित करण्यात आले होते.
देशात सज्जनशक्तीला संघटित व संस्कारीत करण्याचे काम संघातर्फे होत असून भारत माता हा संघाच्या कार्याचा केंद्रबिंदू आहे. जगात सर्वत्र युद्ध सुरू असताना जगाच्या कल्याणासाठी केवळ आपला देश भारत कार्यरत आहे. समाजात अनेक सज्जन व्यक्ती आहेत. या सज्जनांनी एकत्र आले, तर राष्ट्राचे कल्याण होईल व आपला देश परम वैभवाला जाईल असा विश्वास यावेळी बोलताना डॉक्टर कावरे व्यक्त केला.
दीप प्रज्वलन, भारत माता व गोमाता पूजनाने हिंदू संमेलनाला सुरुवात झाली. ज्योती मोहितकर यांनी कार्यक्रमाचे संचालन केले. शंकर बुरघाटे यांनी प्रास्ताविक व पाहुण्यांचा परिचय करून दिला. ऋषी मडावी यांनी उपस्थितांचे आभार मानले.
हिंदू संमेलनापूर्वी भव्य शोभायात्रा काढण्यात आली. या शोभायात्रेत भगवे टोप्याधारी नागरीक,महिला सहभागी झाले होते. शोभा यात्रेत सहभागी झालेले राम-लक्ष्मण- सीता व महादेवाच्या वेषातील मुले, देखावे व भजन मंडळी, वारकऱ्यांच्या वेषात लहान मुले हे शोभायात्राचे विशेष आकर्षण ठरले.

🙏 जय विदर्भ 🙏