वरोरा शहरात गुढीपाडव्याच
वरोरा (दि. २० मार्च): – अभिषेक भागडे
हिंदू नववर्षाचे स्वागत आणि गुढीपाडव्याचा उत्साह वरोरा शहरात ओसंडून वाहिला. गांधी उद्यान योग मंडळाच्या वतीने आयोजित विशेष सोहळ्यात, राष्ट्रसंत तुकडोजी महाराजांच्या विचारांचे खंदे प्रचारक आणि गुरुकुंज आश्रम मोझरीचे माजी सर्वाधिकारी लक्ष्मणराव गमे यांना यावर्षीचा प्रतिष्ठित ‘वरोरारत्न जीवनगौरव पुरस्कार’ देऊन सन्मानित करण्यात आले.
पारंपारिक गुढी आणि भव्य बाईक रॅली
उत्सवाची सुरुवात अत्यंत पारंपरिक पद्धतीने झाली. खासदार प्रतिभा धानोरकर, आमदार करणदादा देवतळे आणि वेदांती देवतळे यांच्या हस्ते गुढीचे पूजन करण्यात आले. ढोल-ताशांच्या गजरात बैलबंडीवर गुढी उभारून संस्कृतीचे जतन करण्यात आले. यानंतर शहरातून काढण्यात आलेल्या भव्य बाईक रॅलीने सर्वांचे लक्ष वेधून घेतले. भगवे फेटे परिधान केलेले महिला व पुरुष मोठ्या संख्येने या रॅलीत सहभागी झाले होते, ज्यामुळे संपूर्ण वरोरा शहर नववर्षाच्या रंगात न्हाऊन निघाले होते.
स्वराभिषेकाने रसिक मंत्रमुग्ध
सायंकाळी डॉ. आंबेडकर चौक येथे सांस्कृतिक कार्यक्रमांची मेजवानी रंगली. अयोध्या येथील श्रीराम मंदिर प्राणप्रतिष्ठा सोहळ्यात गायन सेवा देणाऱ्या धनश्री व भाग्यश्री वाटकर भगिनींनी मराठी आणि हिंदी भक्तीगीतांची सुश्राव्य मैफल सादर केली. त्यांच्या सुमधुर आवाजाने वरोरेकर रसिक मंत्रमुग्ध झाले.
जीवन गौरव आणि ग्रामगीतेचा संदेश
कार्यक्रमाचे मुख्य आकर्षण म्हणजे लक्ष्मणराव गमे यांचा सपत्नीक सत्कार. चंद्रपूर जिल्हा मध्यवर्ती सहकारी बँकेचे अध्यक्ष रवींद्र शिंदे यांच्या अध्यक्षतेखाली हा सोहळा पार पडला. सत्काराला उत्तर देताना गमे गुरुजी भावूक झाले. ते म्हणाले, “जीवनात सुसंस्कार घडवायचे असतील तर गुरुदेव सेवा मंडळाची दारे उघडावी लागतील. प्रत्येकाने ग्रामगीतेची किमान एक ओळ रोज वाचावी, तरच जीवन सार्थक होईल.” राष्ट्रसंतांच्या कार्यामुळेच गुरुकुंज आश्रमाला ‘अ’ दर्जा प्राप्त झाल्याचेही त्यांनी नमूद केले.
मान्यवरांची उपस्थिती
या सोहळ्याला नगराध्यक्ष अर्चना ठाकरे, योगाचार्य प्रकाश संचेती, ज्येष्ठ योग साधक ज्ञानचंद मालू आणि मंडळाचे अध्यक्ष नरेंद्र नेमाडे यांची प्रमुख उपस्थिती होती. यावेळी रवींद्र शिंदे, अर्चना ठाकरे, नगरसेवक खेमराज कुरेकर, अभय ठावरी आणि शंभूनाथ वरघणे यांचाही विशेष सत्कार करण्यात आला.
कार्यक्रमाचे नेटके संचालन डॉ. प्रशांत खुळे यांनी केले, तर मानपत्राचे वाचन प्रा. हिमगौरी देशपांडे यांनी केले. आनंद गुंडावार यांनी उपस्थितांचे आभार मानले. हा सोहळा यशस्वी करण्यासाठी गांधी उद्यान योग मंडळाच्या सर्व सदस्यांनी अहोरात्र परिश्रम घेतले.
ताज्या घडामोडींसाठी पाहत राहा: ‘स्वतंत्र विदर्भ न्यूज पोर्टल, वरोरा’
🙏 जय विदर्भ 🙏
