🛑🙏धडाकेबाज कारवाई! वरोऱ्यात राज्य उत्पादन शुल्काचा थरार; १२ लाखांच्या मुद्देमालासह ‘बनावट दारू’ जप्त!🙏🛑

​वरोरा : -अभिषेक भागडे
वरोरा शहरात अवैध धंद्यांविरुद्ध राज्य उत्पादन शुल्क विभागाने आतापर्यंतची सर्वात मोठी आणि आक्रमक कारवाई केली आहे. बोर्डा चौक परिसरात मध्यरात्री फिल्मी स्टाईलने सापळा रचून बनावट देशी दारूची वाहतूक करणारी स्कॉर्पिओ गाडी पकडण्यात आली असून, एकूण १२ लाख १९ हजार रुपयांचा मुद्देमाल जप्त करण्यात आला आहे. या कारवाईने दारू माफियांमध्ये प्रचंड खळबळ उडाली आहे.
​नेमकी घटना काय?
​राज्य उत्पादन शुल्क विभागाला गुप्त बातमी मिळाली होती की, एक पांढऱ्या रंगाची स्कॉर्पिओ (क्रमांक MH-34-CD-3336) बनावट दारूचा साठा घेऊन बोर्डा ते राधा मिलन मंगल कार्यालय रोडवरून जाणार आहे. या माहितीच्या आधारे पथकाने १३ मार्च २०२६ रोजी रात्री ११:३० च्या सुमारास बोर्डा चौकात सापळा रचला. संशयास्पद गाडी येताच पथकाने तिला घेराव घालून झडती घेतली.
​आत काय आढळले?
​गाडीची तपासणी केली असता, त्यात नामांकित ‘रॉकेट देशी दारू संत्रा’ कंपनीचे हुबेहूब लेबल असलेले बनावट दारूचे ५० बॉक्स (एकूण ५००० नग) आढळले. या बनावट दारूची किंमत अंदाजे २ लाख रुपये असून, गुन्ह्यात वापरलेली १० लाख रुपयांची स्कॉर्पिओ असा एकूण १२,१९,०००/- रुपयांचा मुद्देमाल पोलिसांनी जागेवरच जप्त केला.
​आरोपी जेरबंद
​या प्रकरणी आशिष रमेश मीटपल्लीवार (वय २३ वर्ष, रा. बोर्डा, वरोरा) याला जागीच ताब्यात घेण्यात आले आहे. त्याच्यावर महाराष्ट्र दारूबंदी कायदा १९४९ आणि भारतीय न्याय संहिता (BNS) १२३ अन्वये गुन्हा दाखल करण्यात आला आहे.
​कोणी केली ही धडाकेबाज कामगिरी?
​राज्य उत्पादन शुल्क आयुक्त डॉ. राजेश देशमुख आणि जिल्हाधिकारी विनय गौडा यांच्या मार्गदर्शनाखाली ही कारवाई करण्यात आली. यामध्ये निरीक्षक प्रवीण मोहतकर, दुय्यम निरीक्षक सचिन पोलेवार, सागर दिडसे, प्रमोद रजोते, हर्षराज इंगळे विलास महाकुलकार, जितेंद्र आनंद, जगदीश मस्के, मंगेश कुलटे, अमोल भोयर, किशोर पेजुरवार, शुभम गोवारदिपे आणि त्यांच्या पथकाचा समावेश होता.
​वरोरा शहरात छुप्या पद्धतीने चालणाऱ्या अवैध दारू विक्रीच्या अड्ड्यांचे धाबे या कारवाईमुळे दणाणले आहेत. या प्रकरणाचा पुढील तपास दुय्यम निरीक्षक सचिन पोलेवार करत असून, या रॅकेटचे धागेदोरे कोणापर्यंत पोहोचतात, याकडे सर्वांचे लक्ष लागले आहे.