🛑🙏 अपयशाचतूनच यशाचा महामार्ग खुला होतो- विद्यार्थ्यामध्ये जिद्द निर्माण करा आ. सुधीरभाऊ मुनगंटीवार यांचे शिक्षक- प्रशिक्षकाना आवाहन🙏🛑

” उथळपेठ येथे बीटस्तरीय बाल क्रीडा व सांस्कृतिक महोत्सवाचे दिमाखदार उद्घाटन ”

चंद्रपूर :- ✍️ अभिषेक भागडे
क्रीडा स्पर्धेत विजय-पराभव हा अविभाज्य भाग असतो. मात्र पराभव स्वीकारून त्यातून उभारी घेणे आणि “उद्याचा दिवस माझाच आहे” असा ठाम संकल्प करण्याची मानसिकता विद्यार्थ्यांमध्ये रुजविणे ही शिक्षक-प्रशिक्षकांची सर्वात मोठी जबाबदारी आहे. अपयशातूनच खरे यश घडते, असे ठाम प्रतिपादन राज्याचे माजी वने, सांस्कृतिक कार्य व मत्स्यव्यवसाय मंत्री तथा आमदार श्री. सुधीर मुनगंटीवार यांनी केले.

उथळपेठ येथे आयोजित बीटस्तरीय बाल क्रीडा स्पर्धा व सांस्कृतिक कार्यक्रमाचे उद्घाटन त्यांच्या हस्ते मोठ्या उत्साहात पार पडले. यावेळी ते उपस्थितांना मार्गदर्शन करत होते.

या कार्यक्रमास उथळपेठ ग्रामपंचायतचे सरपंच पलिंद्र सातपुते, पंचायत समितीचे गटविकास अधिकारी किशोर शिंदे, गटशिक्षणाधिकारी जयश्री गुज्जनवार, शाळा व्यवस्थापन समितीचे अध्यक्ष गिरधर चिचघरे, उपाध्यक्ष गणेश चिचघरे, उपसरपंच भारती पिंपळे, तसेच ग्रामपंचायत सदस्य, शिक्षक, पालक व ग्रामस्थ मोठ्या संख्येने उपस्थित होते.

२१ शाळांतील २०० विद्यार्थ्यांचा उत्स्फूर्त सहभाग

तीन दिवसीय या स्पर्धेत चिचाळा बीटातील २१ शाळांमधील सुमारे २०० विद्यार्थ्यांनी उत्स्फूर्त सहभाग नोंदविला. विद्यार्थ्यांचा उत्साह व शिस्त पाहून आमदार मुनगंटीवार यांनी विशेष कौतुक करत स्पर्धेसाठी खास बक्षिसांची घोषणा केली.

१००% सोलार ग्राम – उथळपेठची अभिमानास्पद ओळख

आ. मुनगंटीवार म्हणाले,
“१०० टक्के सोलार ग्राम म्हणून उथळपेठने निर्माण केलेली ओळख राज्यासाठी प्रेरणादायी आहे. सुसज्ज ग्रामपंचायत इमारत, भौतिक सुविधा व सीसीटीव्ही यंत्रणेमुळे उथळपेठला आयएसओ प्रमाणपत्र मिळाले, हा माझ्या बल्लारपूर मतदारसंघाचा अभिमान आहे. गावकऱ्यांच्या एकजुटीचे हे जिवंत उदाहरण आहे.”

ज्ञानाची ऊर्जा आणि स्वप्नांची उंच भरारी

“उथळपेठ हे केवळ ऊर्जाग्राम नाही, तर आता ज्ञानाची ऊर्जा आणि प्रेमाची उब देणारे गाव बनत आहे. येथील विद्यार्थी आपल्या क्रीडा कौशल्यातून गावाचा आणि मतदारसंघाचा मान नक्कीच वाढवतील,” असा विश्वासही त्यांनी व्यक्त केला.

जिल्हा परिषदेच्या शाळेतूनही घडतात यशस्वी आयुष्य

विद्यार्थ्यांशी संवाद साधताना आ. मुनगंटीवार म्हणाले,
“मी स्वतः नगरपरिषद व जिल्हा परिषदेच्या शाळेत शिक्षण घेतले आहे. कुठे शिकलो यापेक्षा कसे आणि किती मनापासून शिकलो हे महत्त्वाचे आहे. एकलव्याने जे साध्य केले, ते प्रत्येक विद्यार्थ्याला शक्य आहे. योग्य मार्गदर्शन, मेहनत आणि आत्मविश्वास असेल तर यश अटळ आहे.”

कार्यक्रमाच्या शेवटी आमदार सुधीर मुनगंटीवार यांनी लहान शालेय विद्यार्थ्यांच्या खाऊसाठी आर्थिक मदत देत सामाजिक बांधिलकीचे दर्शन घडविले.

-🙏 जय विदर्भ 🙏-
बातम्या व जाहीराती संपर्क साधा.
☎️ 9673574711
☎️8329889732