🛑🙏 वाहतुकीचे नियम…. पाळा अपघातांना आवरा!🙏🛑

🚦 वाहतुकीचे नियम पाळा… अपघातांना आवरा!

जिल्हाधिकाऱ्यांच्या हस्ते ‘रस्ता सुरक्षा अभियान – 2026’चा दिमाखदार शुभारंभ

चंद्रपूर | दि. 01 जानेवारी : ✍️ अभिषेक भागडे
रस्ते अपघातात होणारे मृत्यू हे नशिबाचे नव्हे, तर मानवनिर्मित आहेत. थोडीशी काळजी, स्वयंशिस्त आणि वाहतुकीचे नियम पाळले तर हे अपघात आणि मृत्यू निश्चितच टाळता येऊ शकतात, असा ठाम विश्वास व्यक्त करत जिल्हाधिकारी विनय गौडा जी.सी. यांनी जिल्ह्यातील प्रत्येक नागरिकाला रस्ता सुरक्षेसाठी पुढे येण्याचे आवाहन केले.

प्रादेशिक परिवहन अधिकारी कार्यालय, वाहतूक नियंत्रण शाखा व जिल्हा रस्ता सुरक्षा समितीच्या वतीने जनता महाविद्यालय, चंद्रपूर येथे आयोजित रस्ता सुरक्षा अभियान – 2026 च्या शुभारंभप्रसंगी ते बोलत होते.

🚔 प्रशासन एकवटले – अपघातमुक्त जिल्ह्यासाठी

या कार्यक्रमाला
मुख्य कार्यकारी अधिकारी पुलकित सिंह,
महानगरपालिका आयुक्त अकुनुरी नरेश,
अतिरिक्त पोलीस अधीक्षक ईश्वर कातकाडे,
प्रादेशिक परिवहन अधिकारी किरण मोरे,
एस.टी. महामंडळाच्या विभागीय नियंत्रक स्मिता सुतवणे,
महाविद्यालयाचे प्राचार्य डॉ. आशिष महातळे यांच्यासह अनेक मान्यवरांची उपस्थिती होती.

⚠️ “एक-दोन मिनिटांचा वेग… आयुष्य हिरावून घेऊ शकतो!”

जिल्हाधिकारी विनय गौडा म्हणाले,
आज रस्त्यांची रुंदी आणि वाहनांची संख्या वाढली आहे. त्याचबरोबर अपघातांचे प्रमाणही वाढले आहे. भारतामध्ये दरवर्षी दीड लाखांहून अधिक लोक रस्ते अपघातात मृत्युमुखी पडतात. हे भयावह वास्तव आपण बदलू शकतो.
अतिवेग, नियमभंग आणि बेफिकिरी हे अपघातांचे मुख्य कारण आहे. आपले जीवन अमूल्य आहे, त्यामुळे वेगावर नियंत्रण ठेवा, हेल्मेट व सीटबेल्टचा वापर करा आणि नियमांचे काटेकोर पालन करा, असे त्यांनी सांगितले.
विशेषतः महाविद्यालयीन विद्यार्थ्यांनी मित्र, कुटुंब आणि समाजात रस्ता सुरक्षेबाबत जनजागृती करण्याचे आवाहनही त्यांनी केले.

🛑 दंड नव्हे, जीव वाचवणे हेच उद्दिष्ट

मुख्य कार्यकारी अधिकारी पुलकित सिंह म्हणाले,
इतर आजारांपेक्षा अपघातात मृत्यूचे प्रमाण अधिक आहे. दंड आकारणे हा उद्देश नसून नागरिकांचा जीव वाचवणे हेच प्रशासनाचे ध्येय आहे.

महानगरपालिका आयुक्त अकुनुरी नरेश यांनी सांगितले की,
रस्ता सुरक्षा ही केवळ प्रशासनाची नव्हे, तर प्रत्येक नागरिकाची जबाबदारी आहे. लोकांचा सहभाग वाढला तरच हे अभियान यशस्वी होईल.

📉 अपघातात 7 टक्क्यांची घट – दिलासादायक आकडेवारी

अतिरिक्त पोलीस अधीक्षक ईश्वर कातकाडे म्हणाले,
2024 च्या तुलनेत 2025 मध्ये अपघात व मृत्यूचे प्रमाण 7 टक्क्यांनी घटले आहे. वाहन चालविताना स्वयंशिस्त पाळल्यास ही संख्या आणखी कमी होईल. अपघात झाल्यास टोल फ्री क्रमांक 108 किंवा 112 वर तात्काळ संपर्क साधावा.

🚌 एस.टी. तिकीट म्हणजे 10 लाखांचा विमा!

एस.टी. महामंडळाच्या विभागीय नियंत्रक स्मिता सुतवणे म्हणाल्या,
विनातिकिट प्रवास टाळा. एस.टी.चे तिकीट म्हणजे 10 लाखांचा विमा आहे. अपघातात अपंगत्व आल्यास 75 हजार ते 5 लाख रुपयांपर्यंत मदत दिली जाते.

🌍 “रस्ता सुरक्षा ही सामाजिक चळवळ व्हावी” – किरण मोरे

प्रास्ताविकात प्रादेशिक परिवहन अधिकारी किरण मोरे यांनी सांगितले की,
रस्ते अपघात हे मानवनिर्मित आहेत. नियम, शिस्त आणि जबाबदारी पाळली तर सुरक्षित व सुंदर आयुष्य जगता येईल. रस्ता सुरक्षा ही केवळ मोहीम न राहता सामाजिक चळवळ व्हावी, यासाठी सर्वांनी पुढाकार घ्यावा.

🏅 अपघातात प्राण वाचविणाऱ्या ‘जीवनदूतांचा’ गौरव

अपघातग्रस्तांना तात्काळ रुग्णालयात पोहोचवून जीव वाचविणाऱ्या
अफरोज नासीर पठाण, दीपक सावरकर, जयकांत थोरात, अमित कोसुरकर, राकेश आमने, योगेश देशमुख, सुरज ढोणे, बापुजी पवार, किशोर कोटरंगे, किशोर ठाकरे, अभिलाषा भगत यांचा यावेळी विशेष सन्मान करण्यात आला.

कार्यक्रमापूर्वी मान्यवरांच्या हस्ते रस्ता सुरक्षा मार्गदर्शिका पुस्तकाचे विमोचन करण्यात आले. तसेच रस्ता सुरक्षा व मतदानाबाबत उपस्थितांनी शपथ घेतली.
कार्यक्रमाचे संचालन सहायक मोटार वाहन निरीक्षक शिवाजी विभुते यांनी केले तर आभार श्रीमती बेग यांनी मानले.

🙏 जय विदर्भ 🙏
बातमी व जाहिरातीसाठी संपर्क :
☎️ 9673574711
☎️ 8329889732