🔥 मोबाईल शॉपी फोडून लाखोंचा माल लंपास!
वरोरा पोलिसांचा धडाका — दोन आरोपी गजाआड, ₹१०.७१ लाखांचा मुद्देमाल जप्त
वरोरा: अभिषेक भागडे
वरोरा शहरातील दोर्रा मार्केट परिसरात असलेल्या एस.एस. मोबाईल शॉपी येथे झालेल्या थरारक चोरीप्रकरणाचा वरोरा पोलिसांनी मोठा पर्दाफाश केला असून, या प्रकरणात एका अल्पवयीनासह दोन आरोपींना अटक करण्यात आली आहे. पोलिसांच्या या कारवाईमुळे शहरातील चोरट्यांच्या टोळ्यांमध्ये खळबळ उडाली आहे.
१७ डिसेंबर २०२४ च्या मध्यरात्री चोरट्यांनी दुकानाचे शटर उचकटून आत प्रवेश करत मोबाईल फोन व मौल्यवान साहित्य मोठ्या प्रमाणात लंपास केले होते. या घटनेनंतर व्यापारी वर्गात भीतीचे वातावरण निर्माण झाले होते.
घटनेची माहिती मिळताच वरोरा पोलिसांनी तात्काळ गुन्हा नोंदवून तपासाची चक्रे वेगाने फिरवली. सीसीटीव्ही फुटेज, तांत्रिक विश्लेषण आणि गोपनीय माहिती यांच्या आधारे संशयितांचा माग काढण्यात आला. अखेर पोलिसांनी वरोरा परिसरातून एक अल्पवयीन आरोपी आणि त्याचा साथीदार यांना बेड्या ठोकल्या.
चौकशीदरम्यान दोघांनीही चोरीची कबुली दिली. आरोपींच्या निशाणदेहीवरून चोरीस गेलेले महागडे मोबाईल फोन व इतर साहित्य हस्तगत करण्यात आले असून त्याची एकूण किंमत सुमारे ₹१० लाख ७१ हजार इतकी आहे.
या प्रकरणी वरोरा पोलीस ठाण्यात भादंवि कलम ३८० अंतर्गत गुन्हा दाखल करण्यात आला असून, या कारवाईत पोलिस अधिकारी व कर्मचाऱ्यांच्या संयुक्त पथकाने उल्लेखनीय कामगिरी बजावली आहे.
वरोरा पोलिस प्रशासनाने स्पष्ट इशारा देत सांगितले आहे की, गुन्हेगार कितीही शिताफीने चोरी करत असले तरी पोलिसांच्या नजरेतून कोणीही सुटणार नाही. नागरिकांनी कोणतीही संशयास्पद हालचाल आढळल्यास तात्काळ पोलिसांना माहिती द्यावी, असे आवाहनही करण्यात आले आहे.
-🙏जय विदर्भ 🙏-
जाहिराती आणि बातमी करता संपर्क साधा.
☎️ 9673574711
☎️8329889732
