स्वतंत्र विदर्भ न्यूज पोर्टल | विशेष बातमी
—
⚡ वीज ग्राहकांना प्रीपेड मीटरची सक्ती नाही
मुख्यमंत्री देवेंद्र फडणवीस यांचे स्पष्ट शब्दात स्पष्टीकरण
नागपूर : अभिषेक भागडे
राज्यातील सामान्य वीज ग्राहकांमध्ये प्रीपेड स्मार्ट मीटर बसविण्याबाबत निर्माण झालेल्या संभ्रमावर मुख्यमंत्री देवेंद्र फडणवीस यांनी आज ठाम भूमिका मांडत मोठा दिलासा दिला आहे. “सामान्य घरगुती वीज ग्राहकांना प्रीपेड मीटरची कोणतीही सक्ती केली जाणार नाही,” असे स्पष्ट स्पष्टीकरण त्यांनी विधानसभेत दिले.
केंद्र सरकारच्या स्मार्ट मीटर योजनेअंतर्गत राज्यात टप्प्याटप्प्याने स्मार्ट मीटर बसविण्याचा निर्णय घेण्यात आला असला, तरी सुरुवातीच्या टप्प्यात सर्वसामान्य ग्राहकांना प्रीपेड मीटर लावले जातील, अशी चर्चा सुरू होती. मात्र, या चर्चांना पूर्णविराम देत मुख्यमंत्री फडणवीस यांनी स्पष्ट केले की, सामान्य घरगुती ग्राहकांसाठी फक्त पोस्टपेड स्मार्ट मीटरच बसविले जातील.
मुख्यमंत्र्यांनी सांगितले की, पहिल्या टप्प्यात शासकीय कार्यालये, शासकीय आस्थापना तसेच काही विशिष्ट ठिकाणीच प्रीपेड स्मार्ट मीटर बसविण्यात आले आहेत. सामान्य नागरिकांवर कोणताही आर्थिक किंवा तांत्रिक भार टाकण्याचा सरकारचा विचार नाही.
दरम्यान, सुरुवातीला प्रत्येक नवीन वीजजोडणीसाठी प्रीपेड स्मार्ट मीटर बसविण्याचा प्रस्ताव होता. मात्र, त्यावर मोठ्या प्रमाणात आक्षेप नोंदविण्यात आल्याने राज्य सरकारने अंमलबजावणीचा निर्णय टप्प्याटप्प्याने घेण्याचा मार्ग स्वीकारला असल्याचेही मुख्यमंत्र्यांनी स्पष्ट केले.
मुख्यमंत्री फडणवीस पुढे म्हणाले की, “स्मार्ट मीटर स्वीकारणाऱ्या ग्राहकांना पुढील पाच वर्षांसाठी सुमारे १० टक्के सवलत देण्यात आली आहे. त्यामुळे आतापर्यंत स्मार्ट मीटरमुळे नागरिकांना प्रत्यक्ष लाभ झाला आहे.”
या स्पष्ट भूमिकेमुळे राज्यातील लाखो वीज ग्राहकांमध्ये निर्माण झालेला संभ्रम दूर झाला असून, प्रीपेड मीटरच्या सक्तीबाबत पसरलेल्या अफवांना पूर्णविराम मिळाला आहे.
—🙏 जय विदर्भ 🙏—
✍️ स्वतंत्र विदर्भ न्यूज पोर्टल
विदर्भाच्या प्रश्नांचा निर्भीड आवाज.( बातमी आणि जाहिरातीसाठी संपर्क साधा. ☎️ 9673574711 ☎️ 8329889732
