🙏अखेर शेतकरी आंदोलनाला यश 🙏

1. 📰 राज्यातील शेतकऱ्यांना ३० जून २०२६ पूर्वी कर्जमाफीचा निर्णय — मुख्यमंत्री देवेंद्र फडणवीस यांची घोषणा.

मुंबई : राज्यातील शेतकऱ्यांसाठी मोठी आनंदवार्ता! मुख्यमंत्री देवेंद्र फडणवीस यांनी जाहीर केले आहे की ३० जून २०२६ पूर्वी राज्यातील शेतकऱ्यांना कर्जमाफी दिली जाणार आहे. शेतकरी कर्जमाफीसंदर्भात आंदोलक प्रतिनिधी शिष्टमंडळासोबत सह्याद्री अतिथीगृह येथे झालेल्या महत्त्वपूर्ण बैठकीत त्यांनी ही घोषणा केली.

मुख्यमंत्री फडणवीस म्हणाले की, कर्जमाफीच्या अनुषंगाने गठीत समिती एप्रिल २०२६ पर्यंत आपला अहवाल आणि शिफारसी सादर करेल. त्या शिफारसींवर आधारित प्रक्रिया पूर्ण करून तीन महिन्यांच्या आत म्हणजेच ३० जून २०२६ पर्यंत कर्जमाफी अंमलात आणली जाईल.

त्यांनी सांगितले की, “नैसर्गिक आपत्तीमुळे संकटात सापडलेल्या शेतकऱ्यांच्या खात्यात थेट आर्थिक मदत देणे अत्यावश्यक आहे, कारण तसे केले नाही तर रब्बी हंगामाची पेरणी अडचणीत येईल. त्यामुळे सध्या आम्ही ३२ हजार कोटींच्या पॅकेज वितरणाला प्राधान्य देत आहोत.”

या पॅकेजअंतर्गत राज्यातील शेतकऱ्यांना ३२ हजार कोटी रुपयांची मदत दिली जाणार असून, आत्तापर्यंत ८ हजार कोटी रुपये शेतकऱ्यांच्या खात्यात जमा झाले आहेत. या आठवड्याअखेर आणखी १८,५०० कोटी रुपये वितरित केले जाणार असून, पंधरा दिवसांत ९० टक्के शेतकऱ्यांच्या खात्यात थेट रक्कम पोहोचेल, अशी माहिती मुख्यमंत्री फडणवीस यांनी दिली.

या बैठकीस उपमुख्यमंत्री एकनाथ शिंदे, उपमुख्यमंत्री अजित पवार, तसेच महसूल मंत्री चंद्रशेखर बावनकुळे, कृषी मंत्री दत्तात्रय भरणे, जलसंपदा मंत्री गिरीश महाजन, पणन मंत्री जयकुमार रावल, राज्यमंत्री ॲड. आशिष जयस्वाल, राज्यमंत्री डॉ. पंकज भोयर यांच्यासह वरिष्ठ अधिकारी उपस्थित होते.

शेतकरी आंदोलन शिष्टमंडळाच्या वतीने माजी राज्यमंत्री ओमप्रकाश बच्चू कडू, खासदार राजू शेट्टी, माजी मंत्री महादेव जानकर, वामनराव चटप, रविकांत तुपकर, राजन क्षीरसागर, गिरीश दाभाडकर आणि अजित नवले यांनी सहभाग घेतला.

बैठकीदरम्यान शेतकरी नेत्यांनी विविध मागण्यांबाबत सरकारसमोर मुद्देसूद चर्चा केली. सरकारने शेतकऱ्यांच्या हक्कांच्या प्रश्नांवर सकारात्मक निर्णय घेण्याचे आश्वासन दिले असून, कर्जमाफीच्या अंमलबजावणीसाठी स्पष्ट वेळापत्रक निश्चित केल्याने शेतकरीवर्गात आशेचा किरण निर्माण झाला आहे.                  🙏 जय विदर्भ 🙏 जय जवान जय किसान